Hato don hok mo ban tei ïa ka jaka mane blei ha phyllaw jong ka ophis treikam ka CBI ha Shillong?

Ka Hynñiewtrep Youth Council (HYC), ka leit ban ujor, halor ka jingthmu ban tei ïa ka Ïingmane ha phyllaw jong ka ophis jong ka Central Bureau of Investigation (CBI) bad katei ka dei ka mat kaba kongsan bha, namar ba ka India, ka dei ka ri synshar laitluid jong baroh ki niam bad lada u Kristan, u kwah tei Ïingmane, kumta u Muslim ruh u hap ban tei ïa ka Ïingmane jong u bad kumjuh U Hindu, U Sikh bad kumta ki ophis sorkar, ki donkam ïa kawei ka madan kaba heh bah, na bynta kitei ki jingmane bapher.
Ka ophis CBI, ka don ha Shillong, hynrei ngim ju ïohi, ïa kawei ruh ka jingtohkit jong ka, halor kano kano ka jingshah kynnoh bamsap bad ngim tip ruh, la ka thung nongtrei katno ngut da ki Khasi, ha katei ka jaka treikam kaba la ai mon sngewbha, da ki trai shnong jong ka thaiñ Mawdiangdiang, ba kin buh ïa katei ka ophis ha u pud u sam jong katei ka thaiñ.
Nalor ka jingïakren ïa katei ka jingtei Ïingmane, ka mat kaba ka HYC, ka dei ban tuklar noh mardor bad kata ka long, ba kumno ïa ki Sub Centre lane ïa ki Public Health Centre (PHC), ba la pynkylla lut sha ki jaka khem met lane kita ki wellness centre bad hangtei, kin jer da ki kyrteng hindi, na bynta kiba bun jait ki jingsumar bad balei ba kam bit ban jer da ka ktien Khasi, ha kaba ïadei bad ka khem met, lada dei ha ka laitdoh, ka ing ding, lada dei ha ka kheiñ shyieng, lada dei ha kaba pynkha khun bad ha kiwei ki jingsumar bad ka la dei ban ithuh lane ban pynrung ia ki nongsumar Khasi, lane ban nang pyntbit ïa ki, ha ka jaka jong kitei ki jingsumar jong kiba nabar.
Lyngba ka jingmih jong kitei ki wellness centre, ka la dei toi ban wad ïa kito ki nongsumar kiba tbit jong ka Ri Khasi, ba kin ai jingstad lem ïa kiwei kiba donsap ha kane ka kam sumar briew, khamtam ha kaba ïadei bad ka ing ding, kaba don shibun ki nongduwai kiba tbit bha ha katei ka laiñ bad lada dei ha ka laitdoh, ka kheiñ shyieng bad ka pynkha khyllung, ha kaba ki la bun ki kynthei kiba lait na ka jingïap, lyngba ka jingtbit ki nongsumar Khasi.
Ban wan sha kajuh ka mat, ka long kaba donkam, namarkata ïa ka sorkar India, ba kan sngewthuh ba ka jaka mane blei, ka don la ka jong bad kam lah ban long, ba kan dei ha ki jaka treikam, ha kaba hap ban ïakren ïa ka bha ka miat bad ka synshar khadar, ïa kiba bun bah, khlem da peit ïa ka jingdon niam jong ki bad ka sorkar jylla, ka dei ban peit bha ïa kitei ki kam shit niam, namar ba lada ïa shit, ym dei tang u Hindu, uba shit, hynrei baroh ki ia shit lut, ha la ki jong ki jong ki niam.
Kumta ym lah satia ban shu pynlong jaka mane blei ha katei ka jaka ba don ka ophis treikam jong ka CBI namar ïa katei ka jaka la ai sngewbha da ki nongshong shnong, nga tharai kam dei satia ba kin tei jaka mane jong kano kano ka kynhun hynrei ka dei beit na ka bynta ka ophis CBI ban pynlong ïa ki jingtohkit bapher bapher ha jylla Meghalaya bad kiwei ki jylla lada ki donkam, hynrei kumba ka long mynta, kumba la kdew hakhmat, katei ka ophis haduh mynta ba bun na ki nongshong shnong kim tip bad bna eiei halor ka jingdon jong katei ka ophis CBI ha Shillong, babun ki khmih lynti ne nang pyrkhat beit ba ka ophis CBI ka don ha Nongbah Guwahati, kumta imat lah ban ong ba bun na ki jingtohkit lada jia jia eiei ne aiti sha ka, la khmih lynti beit ba kan wan na Guwahati, kumba long ka jingjia ha Mukroh, bad dei halor kane ruh imat ba ka Assam ka long halor haba ïadei bad kiei kiei baroh ha kane ka thaiñ shatei lammihngi.