Yn pynbna u Myntri Rangbah ïa ka jingthmu bad thong ba kongsan kaba ïadei bad ka AI

Shillong, Naiwieng 22 : Ka sorkar Meghalaya, ryngkat ka jingïatreilang bad ka India AI Mission kaba hap hapoh ka Tnad Electronics & Information Technology, Sorkar India, kan sa pynlong ïa ka Regional AI Impact Conference, ha ka 3 tarik Nohprah 2025, ha State Convention Centre, Shillong. Kane ka jingïalang ka dei shi bynta ka kam ha ka ri baroh kawei ka ban poi sha ka India – AI Impact Summit 2026. Ka Tnad Information Technology & Communications, Sorkar Meghalaya, ka dei ka tnad ban peit ïa ka jingpynlong ïa kane ka jingïalang. La jied ïa ka IIM Shillong kum ka Knowledge Partner na ka bynta kane ka jingïalang.
Ka phang pdeng jong ka jingïalang “AI for CE (Artificial Intelligence for Citizens’ Empowerment): Smarter Governance, Better Lives,” kan wanrah lang ïa ki heh sorkar, ki nongïalam ha ka kam karkhana, ki kompeni teknoloji ha ka pyrthei, ki jaka pule bad ki startup kin ïakren halor ka bynta wanrah ïa ka bynta jong ka AI ha ka jingkylla ha ka bor ïaineh ha kaba ïadei bad ka mariang bad ka jingshakri kaba seisoh bad ka jingtei ïa ki imlang sahlang ba kham shngaiñ bad kaba kham ryntih. Kan don ruh ka jingïalang da ka kynhun jong ka India AI Mission ban pyni ïa ki sienjam bapher bapher ba ïadei bad ka AI ba la shim da ka Sorkar India.
Nalor kine ki jingïalang, kin don ki jingïalang ha ka Showcase Arena, ki ban ai ka rynsan ïa ki nongshim bynta bapher bapher ban pyni ïa ki sienjam & jingpynwandur jong ka AI, ki jingïalang ai jingmut bad jingïamir jingmut, bad ka jingïadei hapdeng ki briew/seng kiba don kajuh ka jingmut jingpyrkhat.
U Myntri Rangbah ka jylla Meghalaya u la ai ka jingmynjur ban plie paidbah ïa kane ka jingïalang kum u Kongsan. Kane ka jingïalang kan sakhi ruh ïa ki jingplie ïa ka Bhashini Hackathon (ktien Garo & Khasi), ka jingplie paidbah ïa ka prokram MeghDEE, ka jingsoi ïa ka MoU ban seng ïa ka Data & AI Lab, bad ka jingsoi ïa ka MoU bad ka MATH T-Hub.
La khmih lynti ba u Myntri Sorkar Pdeng ba dei khmih ïa ka Tnad Electronics and Information Technology bad ki heh ophisar na ki Tnad sorkar pdeng bad ki jylla ka thaiñ shatei lammihngi kin ïadon bynta lang ha kane ka jingïalang kaba heh. U Myntri Rangbah ka jylla Meghalaya u Conrad K Sangma uba dei peit ruh ïa ka Tnad Information Technology & Communications, Sorkar Meghalaya u thmu ban pynbna ïa ki polisi ba kongsan ha kane ka jingïalang kaba pyni ïa ka Meghalaya kum ka nongsdang jong ka AI ha ka thaiñ bad ka bor ha ki jingsaiñdur thymmai kiba don nongrim ha ka teknoloji.
Ha kane ka jingïalang yn don ruh ka jingïalang hapdeng u Myntri Rangbah ka Jylla bad ki nongbei tyngka ba pawkhmat, kaba thmu ban buh ïa ka Meghalaya kum ka jaka kaba dang kiew sha ka jaka pdeng jong ki kam digital bad ka jingsaiñdur ha ka thaiñ mihngi ka India.
Kan don ka Exhibition ha kane ka juh ka jaka, ha kaba yn pyni ïa ki sienjam bapher bapher jong ka AI bad ka teknoloji ba dang mih da ki kynhun sorkar, kito kiba ïatreilang ha kane ka kam bad ki jaka wad bniah bad ki jaka ai jinghikai.
“Kum ka jingpynkhreh ïa kane ka jingïalang ka ban long ha ka 3 tarik u Nohprah, ki katto katne ki campaign shwa ka jingïalang lyngba ki jaka pule kum ka IIM Shillong, NIT Meghalaya bad ka NIELIT, Shillong ki la dep sdang ban wanrah ïa ka jingpynsngewthuh shaphang ka AI hapdeng ki samla pule bad wanrah ïa ka jingshongshit na ka bynta kane ka prokram ka ban long ha Shillong”, la ong u Pravin Bakshi, Commissioner & Secretary, IT&C Department.
La khmih lynti ba kane ka jingïalang kaba kongsan kan pynmih ïa ki jingtip kiba lah ban pyntreikam bad ki jingai jingmut halor ki polisi na ka bynta ka India-AI Impact Summit 2026.