Nongpoh, Naiwieng 21: Na ka liang ka Tnad State Disaster Management Authority, Meghalaya bad ka District Disaster Management Authority, Ribhoi District ha ka 19 tarik u Naiwieng ka la pynkut noh ïa ka jingai jinghikai sha ki khun samla ba kin long kum ki AAPDA Mitra Volunteer kaba dei ruh ka batch ka baar. Katei ka jinghikai kaba la sdang naduh ka 12 tarik Naiwieng la ïa shim bynta da ki Samla Volunteer jong ka (NYKS) My Bharat Yuva Volunteer bad na Bharat Scouts and Guides lyngba ka YUVA AAPDA Mitra Scheme (YAMS).
Ha kitei ki 8 sngi na ka liang ki heh ophisar jong ka tnad Disaster ki la hikai sha ki samla kumno ban ïaleh ha ki por ba wan lynshop ki bor jong ka mariang khamtam ha ki por ba wan khie u jumai ha kaba la ïalam ïa kitei ki samla kiba wan shah hikai na kawei ka jaka sha kiwei pat khnang ba kin ïoh ïa ki jinghikai ba kumno ban ai ïa ki jingïada bad ki jingïarap kiba kyrkieh sha ki briew kiba ngat ha ki jingmynsaw haba wan lynshop ki bor Mariang ne kino kino ki jingjia aksiden.
Ha kane ka sngi pynkut, la wan ban ïadonlang da u BDO ka Mawhati Bah G. Mylliem, Dr. E. Kharkongngor Principal ka Ribhoi College, J Mawthoh, District Disaster Management Ophisar (DDMO), Bah B.K Swer, Deputy Controller Civil Defence, Nongpoh, ha kaba la ïoh ruh ban sam ïa ki syrnot sha baroh ki samla volunteer kiba la pyndep ïa katei ka jingshah ai jinghikai.
