Jowai, Naiwieng 17: Ka Larnai SC ka la long ka nongjop ha ka jingïakhun Semi final kaba nyngkong ha ka lympung phutbol bala tip kum ka ‘Hajan Shylla Memorial Trophy First Division 2025’ bala pynïaid daka Thadlaskeiñ Sports Association (TSA) West Jaiñtia Hills kaba la long ha ka Lah sngi U Blei, 17 tarik u Naiwieng, 2025, ha madan Wahiajer Multi-Sports Complex.
Ha kane ka jingïakhun ka Larnai SC kala lah ban pynliem noh da 3-1 kol ïaka Ummulong Sports Club ban pynthikna ïa ka jaka ha ka phainal.
Dei ka Ummulong kaba la pynkhihjar nyngkong tang mar ïasdang lyngba u Lamphrang Dkhar (3’) hynrei ka jinglamkhmat kam shym la neh slem naba u Ïaidonryngkat Shadap u la pynïakhaid noh ha ka minit kaba 10 na ka bynta ka Larnai shuwa ban jam sha ka por shongthait.
Ka jingïakhun ha ka kylla miet ka la kham pjah dei tad ynda la jam sha ki 10 minit ba khatduh ba ka Larnai ka la ïoh ban thep sa ar tylli ki kol ban pynskhem ïa ka jingjop, kiba la thep da u Remember Khongïong (70’) bad kawei shuwa ban kut da u Ïaidonryngkat Shadap (80+2’) ha ki minit pynjlan.
La pyntip ka jingïakhun Semi Final kaba ar kan long ha kane ka sngi Ba-ar, 18 tarik hapdeng ka Khliehtyrshi SC pyrshah ïaka Nongkhroh Mawsiang SC.
