Shillong, Naiwieng 17: Ka Ryntih SC bad ka Pohkseh SC ki la khur jingjop ha la ki jong ki jingïakhun ha ka lympung First Division Football League 2025 jong ka Shillong Sports Association, kiba la long hynne ka sngi Nyngkong ha madan First Ground-SSA Stadium, Polo.
Ka Ryntih ka la pynliem ïa ka Nongrah da 2-1 kol ha ka jingïalehkai kaba nyngkong, katba ka Pohkseh ka la jop da 3-1 pyrshah ïa ka Nongkrem SC.
Na ka bynta ka Ryntih, kane ka dei ka jingjop kaba nyngkong ha kane ka samoi, ha kaba ka la shah rem 6 sien, ïakhaid shi sien naki 8 tylli ki jingïalehkai ha ka SSA 1st Division 2025.
Ka Ryntih ka la hap ban wanphai nadien ban jop, ha kaba ka Nongrah ka la pynkhihjar nyngkong lyngba u Mebaiskhem Lyngkhoi (34′) hynrei u Banlam N Kharbhih (45’+2) u la ïohlad ban pynïakhaid tang shuwa ban jam sha ka por shongthait. Ka Ryntih ka la ïoh ban thep syndon ïa ka kol pynjop lyngba u Leversharp Syiemlieh ha ka minit kaba 88 jong ka kylla miet.
Kane ka jingjop ka buh ïa ka jingkyrmen na ka bynta ka Ryntih kaba don mynta ha ka thup kyrdan ba don jingma (relegation zone) ha ka kyrdan ba 7, naba ka dang sah sa kawei ka jingïakhun pyrshah ïa ka Lawsohtun ban pyndep ïa ka samoi, bad ka donkam ban jop ban lait na ka jingshah sloit, katba Nongrah kadei ka jingïakhun kaba khatduh bad ka dang hap ban ap ïa ka resol jong ka jingïakhun hapdeng ka Ryntih pyrshah ïa ka Lawsohtun ban pynthikna ïa ka kyrdan ha ka miej. Kumjuh ka long ïa ka Lawsohtun, ka donkam ban jop palat ïa ka 2 kol ban pyllait ïalade na ka jingshah pynhiar kyrdan.
Ha ka jingïalehkai kaba bud, ka Pohkseh SC ka la pynkut ïa ka samoi jong ka da ka jingjop kaba 3-1 pyrshah ïa ka Nongkrem SC.
Na ka bynta ka Pohkseh kiba la pynkhihjar ki long u Badonkupar Shadap (10′), u Nivodimus Lyngkhei (15′) bad u Jeferson Malngiang (65′), katba ka shi kol jong ka Nongkrem la thep da u Zothanpuia (48′).
Ka jingïalehkai SSA 1st Division Football league 2025 ha kane ka sngi Ba-ar kan sdang ha ka por 2 baje nohphai sngi hapdeng ka Mawtawar SC pyrshah ïa ka Nongthymmai SC.
