Lada pyndonkam ïa ka ktien Khasi ha ki sobjek haduh College ki samla kin ïoh jingmyntoi: Prof. Nonglait

Shillong, Naiwieng, 16: U President jong ka Khasi Authors Society (KAS), u Dr. DRL Nonglait u la banjur ba la donkam kyrkieh ïa ka ktien Khasi ban pyndonkam ïa ki sobjek bapher bapher haduh ka kyrdan pule College.
Haba kren ha ka jingïathir nia halor ka ktien Khasi ha ka jingrakhe ïa ka National Press Day kaba la long ha ka sngi Thohdieng ha nongbah Shillong, u Dr. Nonglait u la ong ba ki samla ka jylla ka Meghalaya ki ïa kynduh mawsiang haba ki ïakhun ïa ki eksamin thungkam ha k ari, kum ka eksamin Union Public Service Commission (UPSC).
U la ong, bun na ki nongthoh eksamin na kiwei kiwei ki bynta jong ka thaiñ shatei Lammihngi ki ïoh jingmyntoi haduh katta katta namarba ki thoh ïa ka eksamin ha ka ktien lajong. U Dr. Nonglait u la ai nuksa ïa ka ktien Bodo bad ong ba watla kam pat eh haduh katta katta ka ktien kaba riewspah, hynrei ki jaidbynriew kiba kren ïa ka ktien Bodo ki ïoh kabu bha namarba ki thoh ïa ka eksamin thungkam ha ka ktien lajong.
U Dr. Nonglait u la kdew ruh ba wat tang i jingïapher i barit eh ha ka jingïoh marks, kan ktah haduh katta katta ïa ka kyrdan ban pas ha ka eksamin.
“Ngi donkam ban kyntiew ïa ka ktien Khasi bad ban pynlong ïa ka na ka bynta ban pule ha ki sobjek bapher bapher haduh ka kyrdan pule College, khnang ba ki samla jong ngi kin dup lah ban ïakhun ha ki eksamin bapher bapher ha ka kyrdan jong ka ri.
U la bynrap ba ka Khasi Authors’ Society (KAS) ka dei kaba ju ïakhun ban pynrung ïa ktien Khasi kum ka ktien Sorkar (official language), khnang ba kino kino ki jingthoh jong ka sorkar yn dup lah ban ïakren ha ka ktien Khasi. “Kam don kano kano ka jingma ban don ar ne lai tylli ki ktien ha ka jylla kum ka ktien sorkar,” la bynrap u Dr. Nonglait.
Ha kawei pat ka bynta u Dr. Nonglait u la ong ba ka KAS kan sa nang ïai bteng ban buddien na Delhi ïa ka jingdawa ban pynrung ïa ka ktien khasi ha ka Khyrnit Baphra jong ka ri riti synshar ka ri India.
U President ka KAS u la pynkynmaw ruh ïa u synñiang u bynhei jong ki kot khubor Khasi kiba la mih ha ki snem kiba kham mynshwa eh kiba da don shisha ka dor haba pule. U la ïaroh ruh ïa ka jingkiew jong kot khubor kiba la noh synñiang shikatdei eh, bad kiba la ai jingmyntoi shi kat dei eh ïa ki paidbah. U la ong ba ki nongthoh jong ki kotkhubor ha ki snem kiba mynshwa ki nongthoh ki da phikir bha ban kan ym don ka jingbakla haba thoh ïa ka ktien Khasi.
Da kaba kyrpad ba dei ban pyrkhat sani bha ïa ka kyrdan jong ka kam thoh khubor ha ka jinglong jingman kaba mynta, u Dr. Nonglait u la ong ba ki kot khubor kiba rim ki dei ki spah ba kongsan bha ha ka ka imlang sahlang u Khasi.
U la pynpaw ïa ka jingsngewkmen ban ïohi ba ki dang don ki Editor jong ki kotkhubor Khasi kiba trei shitom ban pynthikna ban pynbeit ïa ki kyntien bad ka rukom spel dak.
U Dr. Nonglait u la ong ruh ba kam don jingma eiei lada shim kylliang ïa ki kyntien na kano kano ka ktien haba kim don ha ka ktien Khasi. “Ka dei kaba ki ju leh da baroh ban shim kylliang ïa ki ktien na kiwei pat ki jait ktien haba kim don,” u la ong
U la bynrap ruh u sngewkmen ban tip ba ki khanapateng, ki jingïathuh khana bad kiwei kiwei ki jingthoh ki ïoh jaka ha ki kotkhubor.
Shuh shuh u la kyntu ïa ki pateng kiba mynta ban bud ïa ka nuksa na ki nongthoh kiba la rem, khnang ban kyntiew ïa ka ktien Khasi sha ki kyrdan kiba shalor.
Ki nongkren ha kane ka jingïathir nia ki kynthup ruh ïa ka Assistant Professor in Linguistics ha NEHU ka Dr B. Khyriem, ka Assistant Professor jong ka Department of Khasi Dr. Bandarilin Bairo, kiba la batai bniah ïa ki kyndon ban thoh bad ban spel dak ïa ka ktien Khasi.