Da ka Regional Agri Fair pynlong ka CAU, khmihlynti ban shim bynta palat hajar ngut ki nongrep

Nongpoh, Naiwieng, 16: Ka Central Agriculture University (CAU), Imphal kan sa pynlong ïa ka Regional Agri Fair 2025 naduh ka 17 haduh 19 tarik Naiwieng kaba dei ruh kum ka jingkynduh lang ki nongrep, na kylleng ka thaiñ Shatei Lam Mihngi ban kylliang ïa ka jingnang jingtip bad ka jingstad halor ka kam rep kam riang.
Ïa katei ka jingïalang bah yn pynlong ha College of Agriculture (CoA), Kyrdemkulai, Ri Bhoi District ha kaba kin don kumba 74 tylli ki dukan pyni nam ïa ki mar rep mar riang, na ka thaiñ Shatei Lam Mihngi, bad khmih lynti ruh kumba 1600 ki nongrep na kylleng ki jylla ka thaiñ NE kin wan ban shim bynta bad kane kan dei ruh kawei na ki nongïalang ba heh tam ki nongrep ha kane ka thaiñ.
Ha kitei ki 3 sngi kin don ruh ki prokram bapher bapher naduh ki jinghikai, ki jingbatai na ki riew stad bapher bapher ka tnad ka rep ka riang, ban pynsngewthuh ïa ki nongrep halor ki skhim bapher bapher bad khamtam ban weng ïa ki jingeh jong ki ba ki mad ha ka kaba ïadei bad ka rep ka riang.
Nalor ki jinghikai bapher bapher kin don ruh ki jingïakop, ki jingpyninam ïa ki jhur ki jhep, ki syntiew ki skud bad kiwei kiwei ban pyni ïa ka jingtbit bad ka sap kaba ki don ha ka kam rep jhur bad syntiew lem bad kiwei kiwei ki mar rep.