New Delhi, Naiwieng 15: Ka kynhun Myntri jong ka sorkar pdeng ka la rai ba kan kyntiew ïa ka jingdie lilam ïa ki jaka marpoh khyndew kiba don ïa u Caesium, Rubidium bad Zirconium kaba plie ïa kine ki marpoh khyndew bad ban plie ruh ïa ki marpoh khyndew kiba kongsan kiba ïadei bad ki, kum u Lithium, u Tungsten, u REES, u Niobium bad kiwei kiwei.
Ka jingbuh ïa ka bai royalty ïa ka Graphite ha ka ad valorem basis kan wanrah ïa ka jingkylla dor jong une u marpoh khyndew ha baroh ki kyrdan. Ka jingpynkiew ïa ka jingpynmih ha ka ri ïa kine ki marpoh khyndew kan wanrah ïa ka jingduna ha ka jingwanrah marpoh khyndew nabar ri bad ki jingma ha ka kam pynpoi marpoh khyndew bad kan pynmih ruh ïa ki lad kamai ha ka ri.
U Graphite, u Caesium, u Rubidium bad u Zirconium ki long ki marpoh khyndew kiba kongsan na ka bynta ki kam high-tech bad ka jingpynkylla ha ka kam bording. U Graphite bad u Zirconium ki dei ruh napdeng ki 24 tylli ki marpoh khyndew kiba kongsan bad ba donkam bha kiba la ithuh ha ka aiñ Mines and Minerals (Development and Regulation) Act, 1957 (MMDR Act).
U graphite u don ka bynta kaba kongsan ha ki battery jong ki kali elektrik (EV), bad u long u anode, uba plié lad ïa ka jingpynpoi bording kaba heh bad ka jinglah ban charge. Hynrei ka India ka wanrah 60% na ka jingdonkam jong ka ïa u Graphite nabar ri. Kumba ka long mynta, 9 tylli ki par Graphite ki dang treikam ha ka ri bad sa 27 tylli ki block ki dei kiba la die lilam. Shuh shuh, ka GSI bad ka MECL ki la aiti 20 tylli ki block Graphite ki ban die lilam bad kumba 26 tylli ki block ki dang don ha ka jingwad bniah.
U Zirconium u dei u nar ba lah ban pyndonkam ha ki karkhana bapher bapher, kynthup ïa ka bording nuclear, ki kam liengsuiñ, ka koit ka khiah bad ka jingshna tiar, namar ka jinglah ban ïaleh pyrshah ïa ka jingsniew bad ka jinglah ban ïada na ka jingkhluit kaba jur. Ïa u Cesium la pyndonkam khamtam ha ki mar high-tech elektrik, ki GPS, kiwei kiwei ki tiar kiba donkam ïa ka jingbeit ka jingkheiñ, ki tiar ai jingsumar kynthup ha ka jingsumar ïa ka jingpang cancer, bad kiwei kiwei.
Ïa u Rubidium la pyndonkam ha kaba shna ïa ki ïit ba kyrpang ba pyndonkam ha ki fibre optics, ki rynsan telecommunication, ki tiar night vision bad kiwei kiwei.
Dangshen, ka Sorkar Pdeng ka la pynmih ïa ka NIT ha ka 16 tarik u Nailur, 2025, na ka bynta ka Tranche kaba hynriew jong ka jingdie lilam ïa ki marpoh khyndew ba kongsan. Kane ka don ruh 5 tylli ki block u Graphite, 2 tylli ki block u Rubidium bad 1 block kawei kawei ka Cesium bad Zirconium (ki jingtip ba bniah la suhlang). Ka jingmynjur mynta ka sngi da ka kynhun myntri jong ka sorkar pdeng halor ka bai royalty kan ïarap ïa ki nongtyrwador ban tyrwa ïa ki dor jong ki ha ka jingdie lilam.
Ïa ka bai jong ka Graphite la batai bniah ha ka dor jong ka tyngka na ka bynta ka shi ton naduh ka 1 tarik u Nailur, 2014. U dei tang une u marpoh khyndew ha ka thup jong ki marpoh khyndew kiba kongsan bad kiba donkam bha ïa kaba la batai ïa ka dor jong ka ha ka shi ton. Shuh shuh, haba pyrkhat ïa ki jingpher ha ka dor jong u Graphite ha ki kyrdan bapher bapher, mynta la rai ban shim ïa ka bai royalty ïa u Graphite ha ka rukom ad valorem, khnang ba ka jingkiew jong ka bai royalty kan ïadei bad ki kyrdan bapher bapher bad kan ïahap bad ka jingkylla ha ka dor jong une u marpoh khyndew. Ha kine ki snem ba la dep, la batai bniah ïa ka bai royalty jong kiba bun ki marpoh khyndew kiba kongsan ha ka jingkheiñ kaba 2% haduh 4%.
