Ka Synshar paidbah ka ai ki lad ki lynti kiba biang ban rah ïa ki mat, ki jingeh jingïatainia: Om Birla

New Delhi, Naiwieng 15: U Lamphang ka Ïing Dorbar Thawain Lok Sabha u Om Birla u la buh ka jingkyrpad kaba jur sha baroh ki seng saiñ pyrthei ba kin pynneh ïa ka burom jong ki kynhun jong ki ïing dorbar thawain da kaba pynthikna ïa ka jingtreikam jong ki kaba ïaid beit ïaid ryntih. U Lamphang u la ban jur ba ka synshar paidbah ka ai ki lad ki lynti kiba biang ban rah ïa ki mat, ban pynpaw ïa ki jingeh, bad ban ïashim bynta ha ka jingïatainia lyngba ki jingïakren kiba suk, kiba la buh ryntih, bad kiba don jingtip. Haba ai jingkren sha ki lad pathai khubor ha ka jaka ba pynlong ïa ka jingïalang ba man la u snem jong ka Commonwealth Parliamentary Association (CPA), India Region, Zone-III kaba la long ha ka Ïingdorbar Thaw Aiñ jong ka Nagaland ha Kohima, u la maham ba ki jingpynthut ba la thmu kim pynthut tang ïa ki rukom treikam jong ka synshar paidbah bad ki pynduh ruh ïa ki nongshong shnong ïa ki jingïatainia kiba don jingmut bad kiba don jingkitkhlieh.
Haba ïadei bad ka Dorbar Tlang jong ka Parliament ka ban sa long shen, kaba la buh ban sdang ha ka 1 tarik Nohprah 2025, u Lamphang u la kyntu ïa baroh ki seng saiñ pyrthei ban pynthikna ïa ka jingïaid beit ïaid ryntih jong ki jingïalang jong ka ïing dorbar thawaiñ. U la ban jur ba ki ïing dorbar thaw aiñ ki dei ban leh ïa ka bynta kaba kham tyngeh bad kaba tei na ka bynta ka jingsynshar kaba shai bad ka jingthaw ïa ki polisi kiba ïadei bad ka bha ka miat.
Ha shwa kane, haba plie ïa ka Commonwealth Parliamentary Association (CPA) India Region, Zone-III Conference, u Lamphang u la pynpaw ba ki ïing dorbar thaw aiñ ki dei ban don ka bynta kaba kongsan ha kaba pynkylla ïa ka jingmut jingpyrkhat jong ki paidbah sha ka polisi. U Om Birla u la peit bniah ba ka jingkitkhlieh jong ki ïing dorbar thaw aiñ kam sahkut ha tang ka jingthaw aiñ-ka long ban pynkylla ïa ki jingangnud bad ki jingsngewkhia jong ki paidbah sha ki polisi kiba lah ban leh. U la ban jur ba ka jingroi kaba pura ka lah ban urlong tang lyngba ka jingïashim bynta lang jong ki paidbah, da kaba kdew ba ka jingkiew kaba shisha ka mih haba ki nongshong shnong ki ïadon bynta beit ha ka rukom synshar paidbah.
Ki nongmihkhmat paidbah, u la ong, ki dei ban pynthikna namarkata ba ki sur jong ki nongshong shnong kin paw ha ka rukom kaba don jingmut ha kaba thaw ïa ki polisi.
Ka phang pdeng jong ka jingïalang mynta u snem ka long “Policy, Progress, and Citizens: Legislature as Catalysts of Change”. U Birla u la pynpaw ka jingkyrmen ba ki jingïamir jingmut kiba don jingmut ha ka jingïalang kin ïalam sha ki jingpynkhreh kam kiba skhem kiba thmu ban pynlong ïa ki ïingdorbar thaw aiñ jong ka thaiñ shatei lammihngi kiba kham donbor, kiba don jingkitkhlieh, bad kiba treikam bha.
Ha ka jingai jingkren jong u, u Lamphang u la pynpaw ïa ka jingktah jong ki teknoloji bad ki jingsaiñdur thymmai ha kaba pynjan ïa ki nongshong shnong sha ka synshar paidbah, da kaba kdew ba mynta kiba bun ki ïing dorbar thaw aiñ ki la kylla sha ki rukom treikam khlem kot bad ki rukom treikam da ki lad digital. U la pynpaw biang ba ka nongrim jong ka synshar paidbah ha India ka shong ha ki briew jong ka, ka nongrim kaba la buh kyrpang da ki nongthaw ïa ka Riti Synshar, bad u la ban jur ba ka jinglong kaba shai bad ka jingkitkhlieh ka dei ban long ka bynta ba kongsan ha ka synshar paidbah.
U Birla u la kyntu shuh shuh ïa baroh ki bor thaw aiñ ban shim ïa ki lad ki lynti kum ka jingpyni live ïa ki jingïalang, ki lad digital kiba ïadei bad ki nongshong shnong, bad ki lad ai jingtip kiba ïar ban kyntiew ïa ka jingïashim bynta jong ki paidbah ha ka kam thaw aiñ. “Haba ka jingai jingmut jong ki paidbah ka long ka nongrim jong ka polisi ha kano kano ka jylla, kata ka jylla ka ïoh ïa ka roi ka par kaba ïai bteng bad kaba ïaineh”, u la bynrap.
U Lamphang u la ai jingïaroh ïa ka jingkylla ha ki kam digital kaba phylla kaba la sakhi ha ki ïing dorbar thaw aiñ jong ka thaiñ shateilammihngi, da kaba kdew ïa ka kum ka sienjam kaba kongsan sha ka jingsynshar kaba katkum ka juk mynta bad kaba shai. U la ïaroh khamtam ïa ka Ïingdorbar Thaw Aiñ jong ka Nagaland kaba la long ka Ïingdorbar Thaw Aiñ kaba pura khlem da pyndonkam shuh ïa ki kot ki sla, da kaba batai ïa ka kum ka nuksa ba nyngkong eh jong ka jingsynshar digital ha India. U Birla u la ïohi ba kum kine ki sienjam digital ym tangba ki kyntiew ïa ka jingtreikam bad jinglong shai hynrei ki pynlong ruh ïa ka jingtreikam jong ka ïing dorbar thawaiñ kaba kham suk bad kaba phai khmat sha ki nongshong shnong.
Ha kajuh ka por, u la maham pyrshah ïa ka jingpyndonkam khlem jingkitkhlieh ïa ki teknoloji kiba dang mih, khamtam eh ïa ka Artificial Intelligence (AI), bad kyntu ïa ki nongthaw aiñ ban shim ïa ka AI ha ki rukom kiba kyntiew ïa ka jinglong shai, pynkhlaiñ ïa ki rukom synshar paidbah, bad ban ïada ïa ka burom jong ki kam thaw aiñ.
Halor ki jingïadei hapdeng ka Sorkar Pdeng bad ka Jylla, u Lamphang u la ïohi ba katba kawei pa kawei ka kyrdan jong ka sorkar ka treikam hapoh ki kyndon riti synshar ba la batai shai, ka jingïatreilang hapdeng kine ar ka long kaba kongsan bha na ka bynta ban ïoh ïa ki jingmih kiba lah ban ïohi. U la ban jur ba ka jingïakren kaba tei hapdeng ka Sorkar Pdeng bad ki Jylla kam pynkhlaiñ tang ïa ka jingsynshar hynrei ka ïalam ruh sha ki polisi kiba kham shimkhia, kiba kynthup lang, bad kiba ïadei bad ki jingthmu ba kongsan jong ka thaiñ. U Birla u la kdew shuh shuh ba ka jingpynkhlaiñ ïa ka jingïatreilang ha kine ki snem ba la dep ka la wanrah ïa ka jingkiew kaba khraw ha ki jingdon jingem, ka jingpynïasoh, bad ka jingshakri paidbah ha kylleng ka thaiñ shatei lammihngi.
Da kaba ban jur ïa ka jingdonkam jong ka jingpynkhreh kam kaba bniah na ka bynta ka roi ka par ba pura jong ki jylla ka thaiñ Shatei Lammihngi, u Om Birla u la pynpaw ïa ka jingdonkam ban shimkhia ïa ki jinglong jingman ba kyrpang jong ka thaiñ bad ki jingeh kiba ïadei bad ka jinglong ka suiñbneng. U la ban jur ba kum kane ka jingpynkhreh ka dei ban pynbeit kyrpang ïa ki jingma kiba mih na ka jingkylla ka suiñbneng, kynthup ïa ki jingjia lynshop ki bor ka mariang, kiba ktah jur ïa ka kamai kajih bad ki jingdon jingem jong ka thaiñ. Haba ban jur ïa ka jingdonkam jong ka jingroi kaba ïaineh bad kaba kynthup lang, u Lamphang u la ong ba ki buit pynroi na ka bynta ka thaiñ shatei lammihngi ki dei ban pynïasoh lang ïa ka jinglah ban ïaleh pyrshah ïa ka jingkylla ka suiñbneng, ki jingdon jingem kiba khuid, bad ka jingïashim bynta radbah jong ki shnong ki thaw ban pynthikna ïa ka jingkiew shaphrang kaba jrong samoi.
U la ong shuh shuh ba ka jingïatreilang hapdeng ka Sorkar Pdeng, ki sorkar jylla, bad ki nongshong shnong ha ka thaiñ ka long kaba donkam bha ban pyndonkam ïa ka lad kaba khraw ba ka thaiñ ka don katba dang pynneh pynsah ïa ki jingdon jingem ba bun kyrhai bad ka pateng ba ïadei bad ka deiriti jong ka.
U Om Birla u la ïohi ba ka long ka kam kaba sngew sarong ba baroh ki ïingdorbar thaw aiñ jong ka thaiñ shatei lammihngi ki bat ïa ka riti dustur jong ka jingïamir jingmut lang bad ka jingshim rai katba ki dang pynïahap bad ki jingdonkam bad ki jingangnud jong ka thaiñ. U la ong ba kine ki ïing dorbar thaw aiñ ki dang trei ban pynkhlaiñ ïa ka jingkitkhlieh bad ka jinglong shai ha ka jingsynshar, kaba pyni ïa ka mynsiem ba shisha jong ka synshar paidbah kaba ïashim bynta lang. U Lamphang ka ïing dorbar thaw aiñ Lok Sabha u la ong shuh shuh ba ki jylla jong ka thaiñ shatei lammihngi ki sakhi ïa ka jingkiew kaba stet ha ka jingkyntiew ïa ki jingdon jingem, khamtam ha ka jingpynïasoh surok, lynti rel, bad liengsuiñ.
Ha kaba ïadei bad ka jingthmu jong u Myntri Rangbahduh ka ri u Narendra Modi, u la ong ba ki jingpyrshang ba skhem ki dang ïaid shakhmat ban pynlong ïa ka thaiñ shatei lammihngi kum ka jaka pdeng jong ka roi ka par bad ka bynta kaba kongsan jong ka Act East policy jong ka India. Haba pynpaw ïa ka lad kaba khraw jong ka thaiñ na ka bynta ka jingkiew shaphrang, u Birla u la ong ba ka kolshor kaba ïar, ki riti dustur kiba riewspah, bad ka jingitynnad jong ka mariang ki pynlong ïa ka kaba kyrpang shisha. U la ban jur ba ka jingkyntiew ïa ki mar la jong, ka jingsaiñdur, ki kolshor, bad ki kam shna jingshna tynrai ki lah ban don ka bynta kaba kongsan ha kaba kyntiew ïa ka thong jong ka ri India kaba lah ban kyrshan dalade (Atmanirbhar Bharat). U Lamphang u la kyntu ba ki ïing dorbar thaw aiñ kin shim ïa ki polisi kiba kyntiew ïa ka kam karkhana bad ka jingseng kam seng jam, da kaba thaw ïa ki lad ki lynti kiba kham heh na ka bynta ki nongshong shnong bad ïarap ha ka jingpynkupbor ïa ka ïoh ka kot kaba ïar.
U Om Birla u la pynpaw ka jingshaniah kaba skhem ba ka CPA India Region, Zone-III Conference kaba ar sngi kan ai ïa ki jingai jingmut kiba kongsan ban pynkhlaiñ ïa ki kynhun kiba ïadei bad ka synshar paidbah ha kylleng ka thaiñ, ban pynbha ïa ki rukom thaw aiñ, bad ban kyntiew ïa ka jingshaniah jong ki paidbah ha ka jingsynshar. U la ai khublei kyrpang ïa baroh ki delegate shwa ka Hornbill Festival ka ban sa wan, da kaba ong ïa ka kum ka jingrakhe ha kylleng ka pyrthei ïa ka kolshor, ka jingïaineh, ka jingstad shna dur, bad ka mynsiem ïatreilang jong ka Nagaland.
Haba ai khublei ïa ka jingpdiang sngewbha ba kyrpang jong ka Nagaland, u Lamphang u la ong ba kum kine ki jingïalang ki kyntiew ïa ka jingïadei kaba jan hapdeng ki ïing dorbar thawaiñ jong ka thaiñ shatei lammihngi, kaba ai ka lad kaba kordor na ka bynta ka jingpyrkhat lang halor ki jingangnud jong ka thaiñ bad ki jingthmu ba kongsan jong ka roi ka par. U la ai ka jingkitbok kitrwiang ïa ki briew jong ka Nagaland na ka bynta ka Hornbill Festival ka ban sa long ha u bnai Nohprah, da kaba khot ïa ka kum ka dak jong ka kolshor ba riewspah jong ka thaiñ bad ki riti dustur ba iphuh iphieng.
Ha kane ka sngi, u Myntri Rangbah ka Jylla Nagaland u Neiphiu Rio; u Deputy Chairman ka RajyaSabha, u Harivansh, Lamphang, ka iing dorbar thaw aiñ ka jylla Nagaland, u Shringain Longkümer, bad u Myntri ka tnat Parliamentary Affairs, Sorkar Nagaland, u K.G. U Kenye ruh ki la ai jingkren ha katei ka jingïalang. Ki ïing dorbar thaw aiñ jong 8 tylli ki jylla ka thaiñ shatei lammihngi jong ka ri India ki dei ki dkhot jong ka CPA Zone 3. Ha kane ka jingïalang ki ïing dorbar thaw aiñ na ki 7 tylli na ki 8 tylli ki jylla kiba don ha kane ka zone ki la ïashim bynta. Ha kane ka jingïalang la wan ban ïashim bynta haduh 12 ngut ki presiding officer, ba kynthup ïa 7 ngut ki Lamphang bad 5 ngut ki Symbud Lamphang. Ha kane ka jingïalang la ïashim bynta ruh da ki dkhot ka Parliament na kane ka thaiñ bad ki dkhot jong ki ïing dorbar thaw aiñ.
Ka phang pdeng jong kane ka jingïalang ka long “Policy, Progress & People: Legislatures as Catalysts of Change.” Ki sub-theme ki long: (i) Role of Legislatures in Achieving Viksit Bharat @ 2047; bad ka (ii) Climate Change – In the Light of Recent Cloudbursts and Landslides in Parts of the Northeast Region.