Shillong, Naiwieng, 11: Ki dkhot jong ka Federation of Khasi Jaiñtia and Garo Peoples (FKJGP), Upper Shillong Circle ha ka janmiet sngi Baar ka la ïoh bat ïa ki nongbylla bar jylla ki bym don ïa ki kot ki sla kiba biang, katba ki dang thmu ban leit trei bylla sha ka shnong Shella.
U kyrwoh ba la phah da ka seng, la pyntip ba ïa ki nongbylla bar jylla la ïoh bat da ki dkhot ka FKJGP hakhmat ka ophis treikam jong ka seng kaba don ha 7 Mer, Upper Shillong.
Ka seng ka la maham jur ïa kino kino ki Kontraktor lane ki riew shimet kiba thmu ban wanrah ïa ki nongtrei bar jylla ki bym biang ki kot ki sla khamtam hadien ba ka Sorkar Assam ka la sdang biang ban kyndang ïa ki poiwir kiba suba ba ki lah ban dei ki mynder na ka ri Bangladesh.
