Pynlong Dorbar ka All Jaiñtia Anganwadi & Helper ban pynsngew ïa ki jingeh sha ka sorkar

Jowai, Naiwieng 10: Ka All Jaiñtia Anganwadi & Helper Workers Union kaba kynthup ïa ka East bad West Jaiñtia Hills District mynta ka sngi 10 tarik u Naiwieng kala pynlong ïa ka Dorbar Paidbah ha Hall jong ka Chilliang Raij, Jowai.
Ha kane ka sngi kitei ki nongtrei Anganwadi & Helper kila shim ïa ka rai ban kyrpad ïa ka Director ka Social Welfare Department jong ka Sorkar jylla ban siew noh ïa ka pisa Rs. 3000/- shibnai kum ka (honorarium) ïa kaba ka sorkar kam pat siew naduh u bnai May 2025 haduh u bnai October 2025.
La pynsngew ruh na ka liang ka Sorkar India kala siew manla u bnai ïa ka poisa kaba Rs. 4500/- tyngka shibnai na ka bhah jong ka. Halor kane la ai por ïa ka sorkar jylla ban siew lut ïa katei ka pisa hashwa ban kut jong u bnai November, 2025.
Ha kaba ïadei bad ka bai dieng jong u snem 2025 ka sorkar kam pat dep siew bad kane kala ktah ïa ka rukom shet jingbam sha ki khynnah kiba dap haduh 6 snem bad ïa kiba armet, kumjuh ïa kiba dang ïoh khunlung. La ong kane ka jingleh ka sorkar kala ktah bha ïa ki nongtrei Anganwadi & Helper.
Ha kane ka sngi la jied ruh ïa ki nongkitkam ka All Jaiñtia Anganwadi & Helper Workers Union, kiba long ka kong Amabilis Phawa kum ka President, kong Airafulda Syntem ka Vice President, kong Riphailang Sungoh ka Assistant General Secretary, ka kong Rijanai Dkhar ka Treasurer, lem bad ki dkhot ka Executive Committee Members kiba don 25 ngut na ki sectors bapher bapher.