NEW DELHI, Naiwieng 10: Ka kynhun ïalehkai phutbol ki kynthei jong ka ri India ka la shah pynngat lang ha kajuh ka thup ryngkat bad ka Japan, Australia bad Chinese Taipei ha ka Group C na ka bynta ka AFC U20 Women’s Asian Cup 2026 ka ban long ha Thailand hadien ba ladep pynlong ïa ka jingpynïakap kynhun kaba khatduh (Final Draw) ha Bangkok, Thailand, hynne ka Lah Sngi U Blei, 10 tarik Naiwieng, 2025.
Hadien ba ki la ïoh rung sha ka AFC U20 Women’s Asian Cup hadien 20 snem, ka kynhun ki thei ïalehkai phutbol jong ka ri kan sdang ïa ka jingïakhun pyrshah ïa ka Japan, bud sa ka Australia bad nangta ïa ka China Taipei.
Ka Japan, kaba la wan ba-ar (runners-up) ha u snem 2024, kadei ka kynhun kaba la jop nam lahduh ha ka rekod kaba hynriew sien ïa ka AFC U20 Women’s Asian Cup bad ka lahduh jong ka FIFA U20 Women’s World Cup ha u snem 2018 bad kaba la wan ba-ar ha u snem 2024. Ka Australia ka la pynkut ïa ka lympung ha u snem 2024 ha ka kyrdan ba lai, katba ka Chinese Taipei ka la shah pynkhyllem noh ha ka wat ïakhun group stage.
Ha ka Group A, ka ri kaba pdiang ïa kane ka lympung ka Thailand, ka la ngat lang ha kajuh ka thup bad ka China PR, Vietnam bad ka Bangladesh. Ka Group B ka kynthup ïa ka DPR Korea, Korea Republic, Uzbekistan bad ka Jordan.
Ïa ka AFC U20 Women’s Asian Cup Thailand 2026 yn pynlong ha ki lai tylli ki madan — Rajamangala National Stadium (Bangkok), Thammasat Stadium (Pathum Thani), bad Pathum Thani Stadium (Pathum Thani).
Ki ar tylli ki kynhun kiba wan hakhmat eh na kawei pa kawei ka Group, ryngkat bad ar tylli ki kynhun kyrdan ba-lai kiba kham kynsai, kin ïohrung sha ka Quarter Final. Nangta ki saw tylli ki kynhun kiba rung sha ka Semi Final kin ïoh ban pynthikna ïa ka jaka jong ki ha ka FIFA U20 Women’s World Cup Poland 2026, ha kaba ka DPR Korea ka dei ka kynhun kaba bat ïa ka nam lahduh.
Kane ka lympung kan long naduh ka 01 haduh ka 18 tarik u ïaïong jong u snem ban wan.
Ka jingpynïakap kynhun kaba khatduh na bynta ka AFC U20 Women’s Asian Cup 2026 ki long:
Group A: Thailand, China PR, Vietnam, Bangladesh
Group B: DPR Korea, Korea Republic, Uzbekistan, Jordan
Group C: Japan, Australia, Chinese Taipei, India
