Shillong, Naiwieng 07: U Symbud Myntri Rangbah uba khmih ïa ka tnat Home (Police) u Bah Prestone Tynsong ula banjur ïa ka jingdonkam ban pynneh pynsah ïa ka riti dustur ha Meghalaya, bad ong ruh ba ka sorkar ka shim khia ïa kum kine ki tamasa.
Ïa kane u la kynthoh haba kren ïa ka jingïapher hapdeng ka Shad Nongkrem bad ka Cherry Blossom, da kaba ong ba ka Shad Nongkrem ka dei kaba la leh lyngba ka kñia ka khriam katba ka Cherry Blossom pat kadei kaba la pynlong da ka sorkar ban khring ïa ki samla kiba donsap.
“Lada phi kren shaphang ka Cherry Blossom Festival, ka long kaba pher na kiwei ki tamasa. Kane ka shad Nongkrem ka dei kaba la buh naduh ki mynbarim, nga lah ban ong ba dei ka kam mynsiem. Katba ïa ka Cherry Blossom la pynlong da ka sorkar, kumta ka don ka jingïapher,” ong u Bah Tynsong haba ïakren bad ki lad pathai khubor ha ka sngi pynkut noh ïa ka shad Nongkrem kaba la long ha Smit ha ka sngi Thohdieng.
U Bah Tynsong u la pynthikna ba ka sorkar kan ai ki lad jingïarap na ka bynta ban kyntiew ïa kine jingshad kiba dei ruh lyngba ki riti dustur kum ka shad Wangala, ka shad Seng Khasi, bad ka Behdeinkhlam.
U la kyntu ïa baroh 3 tylli ki district council ha Meghalaya ba kynthup ïa ka KHADC, JHADC, bad GHADC ba kin pynshlur ban pynneh pynsah ïa ki riti dustur kiba ju leh ha ka jylla.
Na ka liang u Bah Tynsong u la banjur ïa ka jingdonkam ban pynlong ïa ki kam ban wadbniah, ban pynneh pynsah bad kyntu ruh ïa ki district council ba kin shim khia ban kyntiew ïa ki riti dustur.
“Ngi kyrpad ïa baroh ki district council ba kynthup ïa ka KHADC, JHADC bad GHADC ban pynshlur ïa ki nongshong shnong ba kin pynneh ïa ka riti dustur kiba don ha ka jylla Meghalaya,” u la ong.
