Shillong, Naiwieng 07: U Myntri Rangbah ka jylla u Conrad K. Sangma, ha ka sngi Thohdieng ula buh ïa u mawnongrim na ka bynta ban tei bad pynitynad ïa ka jaka ba pawnam bha ka Cenotaph Tura, ha ka jingdon lang ryngkat ki Myntri sorkar uba dei ruh u Chairman jong ka Committee, Preservation of Garo Culture and Heritage u Marcuise N. Marak bad u Myntri sorkar ba peit ïa ka tnad Arts and Culture u Bah Sanbor Shullai nalor kiwei pat.
Lah ban ong ba kane ka Cenotaph ha Tura ka ïeng kum ka dak jong ka jingkynmaw ban burom ïa ka jingaiti jong ki shipai Garo Labour Corps kiba la ïakhun ha ka por jong ka thma bah ba nyngkong. Ka projek ka thmu ban pynneh pynsah bad pynjanai ïa kane ka jaka ba pawnam, ban pynthikna ba kan ïai bteng ban shakri kum ka jaka sah kynmaw, jingsarong na ka bynta ki paidbah ka ri lum Garo.
Ha kane ka sngi haba ai jingkren u Myntri Rangbah ka Jylla u Conrad K. Sangma, u la ong ba ka Cenotaph ka dei ka dak bad kaba kongsan bha bad ka Cenotaph kaba don ha Babupara Tura kaba pynkup burom ïa ka Garo Labour Corps ka long kaba ïajan bha bad ki paidbah jong ka ri lum Garo.”
U la ong, “Nga pynpaw ruh ïa ka jingsngewnguh ïa ki dkhot jong ka Committee na ka bynta ban pynneh pynsah ïa ka kolshor bad ka pateng jong ki Garo hapoh ka jingïalam jong u chairman uba dei ruh u myntri sorkar u Marcuise N Marak, ki nongïalam niam, ki riew rangbah bad ki riew pawkhmat bad ki dkhot jong ki sengbhalang kiba la ia synniang lang ban pynwan dur ban shna pynittynad ia ka cenotaph.”
Haba pdiang sngewbha ïa ki bahaïing jong ki shipai ka Garo Labour Corps ha kane ka sngi u Myntri Rangbah u la ong, baroh ki shipai jong ka Garo Labour Corps kiba la ïakhun ha ka thma bah ba nyngkong yn sa ai burom tang shu dep kane ka Cenotaph.
U la ong, “Mynta ka sngi ngi dang shu buh ïa u maw nongrim na ka bynta ban tei pat ïa ka Cenotaph bad ynda la dep ïa ka jingtei ngin sa pynkup burom ïa baroh kiba la shakri ïa baroh ar kiba la duh noh ïa la ka jong ka jingim ha ki ri nongwei bad kito kiba la wan phai sha la iing, ha ka rukom kaba biang na ka bynta ka jingaiti bad jingshakri jong ki.”
Na ka liang jong u, u la kyntu ïa ka Committee for the Preservation of Garo Culture and Heritage ba kin ïa kynduh ïa ki bahaïing jong ki dkhot ka Garo Labour Corps ban ïoh ïa ka jingtip ba bniah bad ka histori jong ki Garo Labour Corps. “Ka sorkar kan ai ka jingkyrshan ba pura ïa kane ka committee ban leh ïa ka jingwad bniah ne ka Research,” u la bynrap.
Haba pynpaw ïa ka jingsngewkmen kaba khraw ïa ka jingshna thymmai ïa ka Cenotaph u Myntri Rangbah ka Jylla u la ong, “Ka jingshna thymmai ka long kaba suk hynrei kaba don burom bad haba ki nongwan jngohkai kin leit jngoh ïa ka Cenotaph kin don kata ka jingsngew bad jinglong khia jong ka Cenotaph.”
Na ka liang jong u, ula ai jingmut ruh ba kum kine ki jaka kiba kongsan da ka jingïarap jong ki kor ki bor kiba mynta ki dei ban don ki jingtip ba la pynsaphriang sha ki nongwan jngohkai shaphang kata ka jaka ne ka mot.
Ki dkhot jong ka Cenotaph Committee, bad ki nongmihkhmat na ka liang ki seng trei mon sngewbha, ki nongïalam shong, ki ophisar bad ki paidbah nong shong shnong kila ïa don lang ha kane ka jingïalang kiba la pynpaw ka jingsngewnguh ïa ka sorkar kaba la tei pat sa ïa kawei ka maw kyrteng ba kongsan ha Tura.
