Haduh 26, 770 ngut kiba ïap ha India tang na ka jingtakhuh kali mynta u 2025: DTO-EJH

Khliehriat Naiwieng 06 : U District Transport Officer East Jaiñtia Hills District, u bah V.R. Ryngkhlem haba kren ha ka jingialang ba pynlong ïa ka prokram Road Safty Week 2025, u la iathuh ba ha ri India ki la don haduh 26770 ngut ki briew kiba la duh noh ïa la ka jingim ha ki jingjia iatyngkhuh kali tang hapoh une u snem 2025, kumta u District Transport Officer na East Jaiñtia u kyntu ïa kiba ñiah kali ba ki dei ban long phikir bha haba ñiah ïa ki kali ba kim dei ban pynher stet than bad ban ïa knieh ban iaid shakhmat ne overtake ha ki jaka ki bym biang ban shim pass, ki dei ban long ïaishah bad ban long phikir haba ñiah kali.
Shuh shuh u District Transport Officer, u la kren halor ka jingdonkam ki nongñiah kali ha ka imlang ka sahlang ha kaba iadei bad ka jingdonkam ban don ka jingkitkhlieh, ka jinglong ryntih haba ñiah kali, ka akor ka burom haba ñiah kali, u la ong ruh ba ïa kane ka prokram yn pynong man la u snem khnang ba kan long kum ka jingpynshai bad ka jingpynkynmaw ïa kiba ñiah kali halor ka jingdonkam ban ñiah ïa ki kali ha ka rukom kaba shngaiñ ïa kiba shong kali bad ïa ki paidbah ban lait bad ban pynduna ïa ka jingjia ïa tyngkhuh kali
U tei u heh sorkar na ka tnat DTO u la pynkynmaw ruh ba donkam ban deng ïa ki seat belts haba ñiah kali, u kyntu ïa kiba ñiahah kali bad kumjuh ruh ïa kiba iaid kjat ha lynti ba ki dei ban long kiba adkar bad long phikir bha ba ki dei ban da peit bha na baroh ki liang ha shwa ba kin iaid ne jam sha shiliang ka surok bad ong ba kane ka phang pdeng jong kane ka Road Safety Week “Sadak Suraksha, Jeevan Raksha” (Road Safety, Life Safety) ka don ka bynta kaba kongsan ban pynkynmaw ïa ka jingdonakam ban iada ïa ka jingim briew lyngba ka jingdon ka jingkitkhlieh haba ñiah kali.
Ha East Jaiñtia Hills Disttrict, ïa ka jingpynlong ïa ka prokram Road Safety Week, 2025 kaba shi taïew kaba don ka phang pdeng under the theme “Sadak Suraksha, Jeevan Raksha,” la pynkut noh mynta ka sngi bad ïa kane ka prokram la pynlong da ka ophis jong u District Transport Officer (DTO), East Jaiñtia Hills District, ha ryngkat ka jingiatreilang bad kiwei kiwei ki tnat sorkar kiba hapoh ka district.
U Motor Vehicle Inspector (MVI), East Jaiñtia Hills District, u bah H. Suchiang, u kyntu ïa baroh ki trai kali bad ïa kiba ñiah kali ba ki dei ban bud bha ïa ki aiñ bad ki kyndon ñiah kali kumba la bthah da ka sorkar, u la ong ruh ba ka jingbun ki kali ka la nang kiew kaba ju wanrah ïa ka jingdheng kali bad wanrah ruh ïa ka jingiatyngkhuh kali bad ka long kaei kaei kaba sngewkhia kumta kum ka tnat kaba dei peit ïa ka jingbit jingbiang lang jong baroh u kyrpad ïa kiba ñiah kali bad kumjuh ruh ïa ki padibah ba kin shim lang ïa ki jingkitkhlieh ban wanrah ïa ka jingshngaiñ ha ka leit ka wan bad ong ruh ba bunsien ka jingjia iatyngkhuh kali ka ju jia dei namar ka jingleh klet ban bud ïa ki kyndon ñiah kali bad ka jingbym lah ban shah, u pynkynmaw ïa kiba ñiah kali ban long kiba long ryntih haba ñiah kali bad ban da pyrkhat bha khang ban lait na kano kano ka jingjia ba snewsih.
U bah H. Suchiang, u pynkynmaw ruh ba donkam ban don ki registration kiba biang bad ki kot ki sla bad ki license kiba biang haba ñiah kali bad ong ruh ba katkum ka aiñ ki khynnah kiba dang hapoh 18 snem kim pat dei ban ñiah kali bad lada lap yn pynshitom ïa ki katkum ka aiñ.
U pynsngew ruh ïa ka jingioh jingiarap kaba na ka sorkar ka hit-and-run compensation scheme kaba T 50,000 hajar tyngka, na ka bynta kiba mynsaw jur pat T 2 lakh tyngka, u kyntu ïa ki paidabh ba kin long kiba iarap lem lada jia ka jingiatyngkhuh kali kaba katkum ka Good Samaritan Law.
U Sub- Inspector (SI) na ka tnat pulit (Khliehriat, Traffic Branch), u bah S. Shadap u kyntu ïa kiba ñiah kali ba kin bud ïa ki aiñ ki kyndon ñiah kali bad ruh ban kiar na kaba dih ïa ki jingdih pynbuaid ha ka por ba ñiah kali, u kyntu ïa kiba ñiah kali ba ki dei ban ailad shwa ïa kito ki kali kiba donkam ban poi kyrkieh kum ki kali kit nongpang, ki kali pynlip ding khnang ba kin dup lah ban ai ki jingshakri ha ka por kaba biang ban ïada ïa ka jingim briew.
Ka Medical Officer, Urban Health & Wellness Centre (UHWC), Khliehriat, Dr Priyanka Shylla ka pynkynmaw ba donkam ban buh ïa ki First Aid Kits hapoh kali
Baroh kiba don ha kane ka prokram ki la shim ruh ïa ki kyntien jingkular ne ka pledge ba la ialam da u District Transport Officer (DTO), East Jaiñtia Hills District ha kaba iadei bad ka jingshngaiñ ha ka leit ka wan haba ñiah kali.
Kiba la ai jingkren ki kynthup ruh u Enforcement Inspector,u bah K. Tyngsong bad u President jong ka Ïatyllilang Drivers Association, u bah H. Rymbai.