Shillong, Naiwieng 05: U Swastic Chettri u la duna tang khyndiat eh ban ïoh kamai dap spah ron hadien ba ka jingïakhun jong ka Meghalaya pyrshah ïa ka Bihar ha ka lympung ïalehkai jong ka Ranji Trophy 2025-26 ha ka plate group ka la kut noh ha ka jingïakhaid ha ka sngi Ba-ar, ha Patna.
Hadien ba ki jingïakhun ha ki arsngi ki la duh ei, na ka liang ka Meghalaya ka la pyndon hok bha ïa ka kabu ksiar hadien ba ka la ïoh ïa ka lad ban tied nyngkong da kaba ïoh ban khyrwit haduh 408 ron la 7 wiket. Ka Bihar ka la pyndep ïa ka jingïakhun da ki 156/4, ha kaba ïa ki point la shu ïa sam noh hapdeng kine ki arliang mamla.
Hynin ka sngi ka Meghalaya ka la ïoh ban kamai 235/4 wiket ha kaba u nongïalehkai ba shah khot sngewbha u Ajay Duhan u la ïoh ban kamai 129 ron bad u Swastic pat u la ïoh ban kamai 54 ron khlem pat liem.
U Swastic watla u dang iakhun ha ka sien kaba ar ïa ki lympung kiba heh, u la lah pat ban kamai suki jai hynne ka sngi watla u la hap noh ka wiket sa tang khyndiat ron ban dap spah ron, hadien ba u la shah pynliem noh ha ka bol jong u Himanshu Singh ha ka por ba u la ïoh ban kamai 94 ron.
Hadien jong u pat, la bud sa u Jasikirat Singh da ki 35 ron bad u Akash Chaudhury (60 ron) kiba la ïoh ban kamai lang haduh 98 ron ha ka wiket kaba 8.
Haba phai pat sha ki rangtied ka Bihar, u Vaibhav u la ïoh ban kamai 93 ron, katba kiwei pat ki rangtied jong ka kynhun ki khlem lah satia ban kamai bha watla katta ka kynhun ka ïoh ban kamai 156 ron ha ki 25 over ha ka run rate kaba 6.24.
Ka Meghalaya kan leit pat mynta sha Surat ha kaba kin kynduh ïa ka Arunachal Pradesh ha ka 08tarik Naiwieng.
