Jowai, Naitung 03: Ka Federation of Khasi Jaiñtia and Garo People (FKJGP) War-Jaiñtia Circle ha ryngkat ka jingïatreilang bad ka FKJGP West Jaiñtia Hills District ha kane 2 tarik mynta u bnai kila pynlong ïa ka jingïalang paidbah namar ka jingduh bording jong ka shnong Padubah kaba hap hapoh ka Amlarem Sub-Division West Jaiñtia Hills District la kumba duna ïa ka 2 bnai eiei naduh ka 16-05-2022.
Ha kane ka sngi ki nongïalam ka seng naduh u bah B. Mukhim President ka FKJGP War -Jaiñtia Circle ula ai ka jingkren da kaba ban jur ba dei ban pynïoh bording kloi ïa kane ka shnong kaba la mad ïa kane ka jingdum kaba la ktah lut ïa ki kam ki jam jong ki paidbah bad khamtam eh ha kum kane ka por eksamin shiteng snem jong ki khynnah skul, ha kajuh ka por ula byrthen tyngeh lada kane ka jingdawa kam urlong kin sa shim da kiwei ki lad ki lynti lada dei ban leit khang tala ïa ka ophis treikam kane ka Corporation ruh ha kano kano ka por.
Na ka liang u Rangbah Shnong ka Padubah ma N. Pohthmi ula kren bynñiaw haduh katta katta ïa ka jingpynslem jong ka MeECL ban pynïoh bording ïa ka shnong, wat la bun bun sien ki la leit mih sha ophis treikam ka Corporation, shuh shuh ula dap da ka jingsngew lynngoh ba balei ha sor tang shu duh light tang shi sngi lane 2 sngi ki la ïoh Tranformer katba ha shnong Paduhbah la jan dap 2 bnai ka jingduh bording, ula buh jingkylli ‘hato ka pisa u nongsor bad ka pisa u nongkyndong ka ïapher mo’.
La ïoh ruh ka jingkren na u Wompher Wann Organising Secretary FKJGP Jaiñtia Zone uba la ong lada kane ka jingduh bording ka dang ïaidbteng hadien ka jingwan ïakynduh ïa ki bor ba dei peit, kin sa shim da kiwei pat ki lad ki lynti kiba tyngeh, ha kajuh ka por u kyntu ïa u MLA ka thaiñ ma Lahkmen Rymbui ba u dei ban shim khia mardor ban pynïoh bording kloi ïa kane ka shnong kaba la mad ïa kane ka jingeh.
kiwei de kiba ai jingkren ki kynthup na u Secretary Shnong u ma C. Pohshna uba la ai khublei ïa ka seng FKJGP kaba long kloi ban tynrong lem ne pynsngew sha ki bor sorkar ha kaba ïadei bad kane ka jingeh, ula kren shai ba ka shnong ka kloi ban ïa snoh kti bad ka seng ha kino kino ki kam kiba ka seng ka leh.
La ïoh jingkren ruh na u ma Batskhem Myrchiang Sport Secretary FKJGP Jaiñtia Zone uba la ïathuh ba maki ruh ki la mad teng iï kane ka jingduh bording hynrei tang hapoh shitaiew ki la iïh light bad u la dap da ka jingsngewkhia halor ka jingleh mynthi ka tnat bording ha haduh jan dap 2 bnai.
Ha kane ka jingïalang la mih ka sur ban leit kynduh ïa i bah Prestone Tynsong Myntri Bording ka sorkar Jylla ha kine ki kyndiat sngi ban wan. Kiba ïadonlang ha kane ka sngi ki kynthup ïa ki dkhot ka seng Circle, ki Unit bapher bapher.
