Jowai, Naitung 03: Ka Synjuk ki Waheh Chnong Jowai hadien ka jingïoh ujor na ki paidbah halor ka jingkiew palat ka dor jong ka tyndong shet jingshet (Gas) kaba dei ban poi haduh ki thliewïing jong ki nongpyndon kam Gas ha sor Jowai.
Na ka liang ki nongïalam ka Synjuk mar mar kila leh ban ïakynduh markhat bad ki nongpynïaid jong ki ar tylli ki Gas Agency kata ka M/s Ripnar Gas Agency bad ka M/s Rymbai Gas Agency.
Katkum ka jinglap jong ka Synjuk ba ka dor jong u tyndong gas ka long Rs. 1091.48 tyngka haduh ban da poi ha phyllaw ïing jong ki nongpyndonkam. Hynrei na ki daw ba ki Agency kim lah ban pynpoi ha manla ki thylliewïing, kumta la pynbeit bad dong ba kin wan buh beit ha ki jaka ba la buh kyrpang (point) hapoh ki dong bapher bapher.
La kyntu ruh ïa ki paidbah nongpyndonkam tyndong shet jingshet ba lada ki lap ïa kino kino kiba shim palat ïa ka dor bai kit kaba long 20 tyngka lait noh kito ki ïing ba kham jngai, ki lah ban wan ujor shakhmat khnang ba kitei ki Agency kin ïoh leh ïa kaba donkam.
Ki nongïalam ka Synjuk kila dep ruh ban phah da ka jingthoh sha ka seng ki nongñiah kali kamai ka West Jaiñtia Hills Local Taxi Owners Association ban pynlong ïa ka Join Meeting na ka bynta ban ïakren ha kaba ïadei bad ka bai kit ki Taxi kamai.
