Nongstoiñ, Naitung, 3: Ki katto katne ngut ki samla rangbah jong ka thaiñ Langshongthiang, kawei na ki shnong ha ka thaiñ jong ka Mawshynrut C&RD Block West Khasi Hills District, ki la pynpaw ïa ka jingbynñiaw haba ïadei bad ka surok PMGSY kaba don ïa ka jingjngai kaba 13 km 868 meter, kaba dei sdang naduh ka shnong Umdang sha Jaïaw, da kaba ki kynnoh ba ka jingshna ïa katei ka surok ka long kaba la suki shaba palat, namar ki la ong ba ïa katei ka surok ha ka jingshisha, la sdang naduh u snem 2018, hynrei kat haduh mynta mynne, wat tang mar shiteng ruh kam pat la dep satia.
Kitei ki samla ki kynthup ïa u bah Norbert Daju na ka shnong Mawlai, bah Kedi Mawsor na ka shnong Jaïaw, Daliwell Mawsor na ka shnong Langshongthiang bad kiwei kiwei.
Haba ïakren bad u nongthoh khubor, kitei ki samla ki la ong ba ïa katei ka surok la trei kontrak da u Sunil Bansal ha ka kyrteng jong ka M/s Royal Cunstruction. Hynrei, ka la long kaei kaei kaba sngew thamula, namar ïa katei ka surok la dep tang kumba tang shi pawa ei ei na ka shi spah, kynthup ïa ka black topping bad kiwei de ki bynta kiba la siang mawria.
Haba bynrap, ki la ong ruh shibun ki muri ym shym la lah ban pyndonkam, la hap ban ïaid narud narud namar ka jingbym pat dep bad ka jingsuki palat ka wanrah jingeh ïa ki paidbah u ba na ki 6-7 tylli ei ei ki shnong kiba pyndonkam ne ïaid lyngba katei ka surok.
Haba ïadei bad katei ka phang na ka liang u bah Edmund Mawsor General Secretary HYC jong ka thaiñ Umdang Shallang, u la kyntu ïa u MLA jong ka thaiñ ba un tuklar lem haba ïadei bad katei ka kam. Lym kumta na ka liang jong ka seng ryngkat bad ki nongshong shnong jong katei ka thaiñ kin ïaid da kawei pat ka lynti.
U bah Norbert Daju pat u la ong ba lada wat haduh ki aiom tlang kan dang ïai long kumne, ym banse ki hap ban lei mudui noh sha ki bor kiba halor wat sha ïing bishar.
