Buh maw nongrim u Jyotiraditya Scindia ïa ka Integrated Sohra Tourism Circuit hapoh ka PM-DevINE

Shillong, Naiwieng, 01: U Myntri ka Sorkar Pdeng uba khmih ïa ka Ministry of Development of North Eastern Region u Jyotiraditya M. Scindia ha ka sngi Saitaiñ u la buh maw nongrim na ka bynta ka Integrated Sohra Circuit Development hapoh ka Prime Minister’s Development Initiative for North Eastern Region (PM-DevINE) bad plie paidbah ïa ki projek bapher bapher jong ka DoNER kiba shongdor T. 233 klur ryngkat ka jingïadonlang u Myntri Rangbah ka jylla Meghalaya u Conrad Sangma, ki heh ophisar jong ka Sorkar Jylla bad kiba ju ïadon bynta ha ki kam jngohkai pyrthei.
Haba kren ha kane ka sngi, u Scindia u la batai ïa ka Meghalaya kum “ka bneng ha ka pyrthei, ka jaka shong ki lyoh bad ki kshaid ba noh rymphum, ha kaba kawei pa kawei ka jingbeh ka lyerka kit ïa ka jingiwbih jong ka burom, ka jingngeit, bad ka jinglaitluid ban kiewshaphrang,” bad u la pynskhem biang ïa ka jingkut jingmut jong ka Sorkar India ban kyntiew ïa ki kam jngohkai pyrthei kaba don jingkitkhlieh, kaba kynthup lang ïa baroh, bad ka kam jngohkai kaba don nongrim ha ka pateng ha kylleng ka thaiñ shatei lammihngi.
U Myntri u la ong ba hapoh ka jingïalam ba ïohi jngai jong u Myntri Rangbahduh u Narendra Modi, kine ki shiphew snem ba la dep ki la pynpaw ïa ka por jong ka jingkylla na ka bynta ka thaiñ Shatei Lammihngi, kaba la pynkylla ïa ka na ka thaiñ “ba la sahkut” sha ka “ka bor ba la pynïasoh.”
U la ban jur ba palat T.6.2 lak klur la pynpoi sha kane ka thaiñ lyngba ka Gross Budgetary Support policy kaba 10%, kaba kyntiew ïa ka jingïasoh, ka jingseng kam, bad ka jingpynkupbor ha kylleng ki kam. Ka Meghalaya, u la ong, ka la long kawei na ki nongïoh jingmyntoi ba hakhmat eh na kane ka jingphaikhmat ba thymmai, kaba la ïohïa ka jingkiew kaba 12-16% ha ki snem hadien ka COVID lyngba ki jingbei tyngka ba la thmu ha ki jingdon jingem, ka jingpynïasoh liengsuiñ bad ka kam jngohkai pyrthei.
U Scindia u la ban jur shaphang ki projek kiba kongsan kum ka surok Shillong-Silchar Greenfield Expressway kaba 166.8 kilomitar (T.22,864 klur) bad ka jingpynheh ïa ka kad liengsuiñ ha Umroi ban hiar khyndew ki liengsuiñ kiba kham heh, kaba ïarap ïa ka jingkiew stet ha ka jingpynher liengsuiñ manla u snem. Ka projek New Shillong City, u la bynrap, kan paw kum ka “smart-green township” bad ka jaka pdeng jong ka jingnang jingstad na ka bynta ka thaiñ shatei lammihngi.
Ka Integrated Sohra Circuit, kaba la saiñdur lang da ka tnad DoNER bad ka sorkar Meghalaya, ka long kawei na ki sienjam ba don jingthmu ba heh ha ka kam jngohkai pyrthei ha ka thaiñ shatei lammihngi. Da ki jingbei tyngka baroh kaba palat ïa ka T.650 klur, kynthup palat T.221 klur hapoh ka MDoNER, ka projek ka thmu ban pynkylla ïa ka Sohra sha ka jaka jngohkai pyrthei kaba bun sngi kaba don tynrai ha ka jingpynneh pynsah bad ka kamai kajih jong ki nongshong shnong.
Ka Sohra Experience Center ha Kutmadan, kaba la shna ha ka jingbei tyngka kaba T.115 klur, kan long kum ka pdeng jong kane ka kam, kaba pyni ïa ka pateng jong ki jaitbynriew bapher bapher jong ka Meghalaya lyngba ki amphitheatre, ki jaka ban ïohi ïa u slap, bad ki jaka pyni ïa ki kam shna jingshna.
Ki projek ki kynthup ïa kabynta jong ka Nohkalikai Falls (T. 26 klur), ka Mawsmai Eco Park (T. 29 klur), Seven Sisters Falls Viewpoint, Shella Riverside Development, bad Wahkaliar Canyon ryngkat bad ki kam jngohkai pyrthei kum ka lad ban shong ïa ki Hot Air Balloon. Lada kheiñ lang, kine ki projek la khmih lynti ba kin kyntiew ïa ka jingpynlut jong ki nongjngohkai hynriew shah, katba kin pynmih palat 4,600 tylli ki lad ïohkam.
Nalor ka Tourism Circuit, la plie paidbah ïa katto katne ki projek jingdon jingem kiba kongsan ban kyntiew ïa ka lad ka leit ka wan bad ka khaii pateng ha ka thaiñ. Kine ki kynthup ïa ka Surok Pynursla-Latangriwan-Mawlynnong (T.29.97 klur), ka ban ai lad ban leit sha ka shnong kaba khuid tam jong ka dewbah Asia ha kano kano ka por bad ban kyntiew ïa ka kam jngohkai pyrthei sha shiliang pud bad ka khaii pateng ha ka thaiñ; Surok Mawshynrut-Hahim (Athiabari) (T.99.76 klur), ba la kyntiew sha ka kyrdan Intermediate lane Standard Road, kaba pynkhlaiñ ïa ka jingpynïasoh ha ka rep ka riang ha ka thaiñ sepngi jong ka jylla Meghalaya; bad la buh mawnongrim na ka bynta ka jingkieng kaba kongsan halor ka wah Umngot ha ka surok Jongksha-Wahïajer (T.21.86 klur), kaba pynïasoh ïa ka East Khasi Hills bad Jaiñtia Hills na ka bynta ka leit ka wan kaba kham bha jong ki briew bad ka jingkit ïa ki mar ki mata.
U Scindia u la pynpaw ruh ba ka jingpynheh ïa ka Runway jong ka kad liengsuin ha Umroi bad ka surok Shillong Western Bypass kaba thymmai kan pynduna ïa ki kynta lei tjingleit hapdeng ka Guwahati bad Sohra sha kumba saw kynta, ka ban pynjan shuh shuh ïa kane ka thaiñ sha ki jaka jngohkai bad ki jaka khaii pateng.
U la ban jur ba ka Sohra Circuit kan pynthikna ba ka dur phuh samrkhie ba nyngkong eh kaba u nongjngohkai pyrthei u ïohi ha Meghalaya kan long ka kamai kajih kaba nyngkong eh kaba ka longïing trai shnong kan ïoh. Ki prokram kyntiew ïa ki sap ha ka jingïatreilang bad ka Meghalaya Skills Development Society bad ka IHM Shillong ki la dep ban ai jinghikai pyntbit ïa ki samla jong ka thaiñ ha ka kam pdiang briew, ka jingpeit ïa ka jingshngaiñ, bad ki rukom treikam kiba ïahap bad ka mariang.
U la pynpaw shuh shuh ba ka tnad DoNER ka shimkhia ban thaw ïa ki lynti ban kiew shaphrang kiba kynthup lang ïa baroh kiba pynneh pynsah ïa ka spah mariang bad ka kolshor jong ka jylla katba ka pynthikna ïa ka kamai kajih kaba neh na ka bynta ki briew jong ka.
U Myntri u la ong, “ka Meghalaya ka ieng mynta ha ka jaka ba ïakynduhlang ka pateng bad ka jingkyrmen. Kine ki projek kim dei tang shaphang ban tei ïa ki jingdon jingem; ki dei shaphang ban tei ïa ka lawei.”
U la pynpaw ïa ka jingshaniah ba ka jingïatreilang hapdeng ka Sorkar Pdeng bad ka Jylla hapoh ka jingïalam jong u Myntri Rangbahduh ka ri u Narendra Modi kan pynlong ïa ka Meghalaya kum ka Jylla kaba don jingïadei, kaba skhem, bad kaba lah ban ïakhun kaba ïalam ïa ka jingïaid lynti jong ka thaiñ shateilammihngi sha ka Viksit Bharat @2047.
Ki Myntri Sorkar kiba la don lang ha kane ka sngi ki long u Timothy D. Shira, Bah Wailadmiki Shylla, Bah Sanbor Shullai, u MLA ka Sohra u Bah Gavin Mylliemngap, u MLA ka Shella u Bah Balajied Synrem, u MDC ka Sohra Bah Titostarwell Chyne, u MDC ka Shella Bah Barikor Synrem.
Shuwa kane, u Myntri u la ïaid kjat ar kynta lyngba ka Rangthylliang, ka jaka ba don ka jingkieng jri kaba jrong tam ha ka pyrthei kaba jrong palat 50 meter. Da kaba sakhi hi dalade ïa ka Jingkieng Jri jong ka Meghalaya, u Myntri u la pyrkhat shaphang ka jingïadei hapdeng ka mariang bad ka jingstad jong u briew, ka jingpynshisha ïa ka jingim kaba ïaineh bad ka jingïaineh kaba la tei da ki spah snem.
Da ka jingïalam jong ki riewshemphang na ka thaiñ, ka jingleit jngoh ka kynthup ruh ïa ka jingïakren halor ki rukom tynrai jong ka jingthaiñ bad jingsumar ïa ki jingkieng jri, kaba pyni kumno ka jingstad jong ka imlang sahlang ka dang ïai bteng ban pynneh ïa ka jingïaid ryntih ka mariang bad ban pynneh pynsah ïa ka pateng kolshor kaba riewspah.
U Myntri u la leit jngoh ruh ïa ka Mushroom Development Centre ha Upper Shillong ha kaba ki sienjam ba thymmai jong ka thaiñ ki ai bor ïa ki nongrep, ki plie ki lad kamai kajih bad ki kyntiew ïa ka roi ka par kaba lah ban shaniah ha lade, kaba lah ban ïaineh ha kylleng ka thaiñ shatei lammihngi.
U Myntri u la ban jur ïa ka jingngeit kaba neh jong ka thaiñ bad ka jingkut jingmut jong ka ha ka roi ka par kaba ïahap bad ka mariang.