Nongpoh, Risaw, 31: Ki samla pule jong ka skulbah Mahatma Gandhi University hynnin ka sngi kila pynlong ka jingkynduh lang jong baroh ki samla pule khasi kiba pule ha katei ka skulbah kum shi para ba la pynlong da ka KSU MGU Unit bad ha katei ka sngi la ïoh ruh ban pynskhem ïa ki nongkitkam ba thymmai jong katei ka Unit.
Na ka liang ki samla pule kum ka jinglehkmen ha katei ka sngi kila pynlong ruh ïa ki prokram bapher bapher naduh ka rwai ka siaw, ka put ka tem bad ka shad tynrai.
Nalor ka jinglehkmen ha katei ka sngi la ïoh ruh ban pynskhem ïa ki nongïalam ba thymmai ka KSU MGU Unit ha kaba u samla Prokerlius Rynshon u la shah jied ban long kum president katei ka unit, u samla Nickson Mawlong kum General Secretary lem bad 17 ngut ki nongkitkam bad 29 ngut ki dkhot ki ban peit ïa ka bha ka miat jong ki samla pule ha katei ka skulbah bad ïa kitei ki nongïalam la wan ban pynskhem bad pyntian smai da u samla Pynkmenlang Sanmiet Education Secretary KSU Sengkmie kum u kongsan.
La sakhi ruh ha katei ka sngi da ka jingdonlang u samla Toning Lapang Education Secretary NKHD unit, u Bah Ricky Majaw General Secretary ka FKJGP NKHD Unit, ki nongïalam na ki circle, ki unit, ki samla pule katei ka skullbah, ki nonghikai lem bad kiwei kiwei.
Haba kren ha kane ka sngi na ka liang u Samla Pynkmenlang Sanmiet u la ong ba kum ki samla pule kiba hap ban ïaid ki lynti ki ba eh ban wad ïa ka jingnang jingstad, hynrei ki samla pule ki dei ban skhem la ka nongrim, ban tip la ka akor ka burom kiba bat la ka tynrai bad ki ba kut jingmut ban poi sha ka thong.
U la sneng la kyntu ruh ïa ki samla pule ha katei ka sngi haba ki leit pule sha kino kino ki jaka ki dei ban tylli kum shipara ban kyntu bad ïarap lem ha ka por ba donkam khamtam ba kin long ki samla kiba ka jaitbynriew ka donkam ïa ki ban shakri bad ban trei hadien ba kila dep ïa ki jingpule.
