Nongpoh, Risaw, 28: Ka Synjuk ki Rangbah Shnong, Ri-Bhoi District ha ka kyrwoh khubor bala phah mynta ka sngi ka la ai ka jingïaroh ïa ki pulit ka Ri-Bhoi hapoh ka jingïalam u Senior Superintendent of Police u VS Rathore kiba la shimkhia ban pynbeit ïa ki nongñiah kali thurmur ha surok bah National Highway, kaba la wanrah ruh ka jingkylluid, ka jingsuk ha ka leit ka wan bad ka jinghiar ki jingjia aksiden.
Haba phah ïa ka kyrwoh na ka liang u Bah BB Makdoh Chairman ka Synjuk ki Rangbah Shnong Ri-Bhoi District u la ong ba kum ka kynhun ki nongïalam shnong bad bun na ki paidbah ha Ri-Bhoi ki sngewdei ban ai ka jingïaroh bad ka jingai mynsiem ïa ki pulit ka Ri-Bhoi kiba la trei shitom ban talasi naphang ïa ki kali ha surok bah bad ban daiñ kuna naphang khamtam kiba dih buaid ha ka por ba ñiah kali kaba ju wanrah shibun ki jingjia ba sngewsih bad jingmynsaw.
Kane ka jingleh ki pulit ka la wanrah ka jingïaid ryntih ha kaba ïadei bad ki jingleh thurmur ha ki surok bah bad lyngba ka jingtalasi na ka por sha ka por ka la pynduna ruh wat ki kam sniew kiba ki runar ki ju leh ïa ki kam ba lai phewjait ban ïaid lyngba u surok bah.
Namarkata na ka liang ka synjuk ki Rangbah Shnong ka la kyrpad ruh sha ki pulit ba kin pynneh ïa kane ka rukom talasi watla kim lah ban leh man ka sngi hynrei ka donkam pat man ka por ban bteng ïa kane ka rukom talasi ban pynduna ïa ki kam sniew bad ki jingjia aksiden.
Kumba la sakhi ha kine ki khyndiat sngi bun na ki kali naduh ki nongñiah ar sha ka ki la sdang ban kohnguh bad bud ryntih ïa ki kyndon bad na ka liang kiba bun ki paidbah ki la sdang ban sngewthuh ba ka jingshngaiñ ka long kaba kongsan haba ki mih sha surok la ki ñiah ïa ki kali rit ne kiba heh.
