Palat 3.5 lak ngut ki longkmie ka Meghalaya kiba long dkhot SHG bad trei ki kam kamai kajih

New Delhi, Risaw 28: Ka Deendayal Antyodaya Yojana – National Rural Livelihoods Mission (DAY-NRLM), kaba la pyntreikam da ka Tnad pynroi jaka nongkyndong, Sorkar India, ka long kum kawei na ki sienjam kaba thmu ban rat dyngkhong ïa ka jingduk ha ki jaka nongkyndong bad pynkupbor ïa ki paidbah nongshong shnong.
Ïa kane ka Mission la sdang ha u snem 2010 bad ka ïaleh ban pynduna ïa ka jingduk da kaba ïarap ïa ki longïing kiba duk, khamtam ïa ki longkmie. Ïa kane la sdang ban plie ki lad seng kam lajong bad ki lad kamai katkum ka sap. Ka treikam lyngba ka rynsan jong ki Self Help Group (SHG) kiba kyntiew ïa ka jingseng kam seng jam, tei ïa ki bor treikam bad pynthikna ka jingïadon bynta ha ka kam pisa tyngka bad ka imlang sahlang kaba kynthup ïa baroh ha ki jaka nongkyndong.
Katto katne ki jingtip kiba kongsan ki pynpaw ïa ka jingheh jong kane ka sienjam, kumba 10.05 klur ki longïing ha ki jaka nongkyndong la wanrah hapoh ki 90.9 lak tylli ki Self-Help Group (SHG) ha kylleng ka ri India. Kane ka jingjop ka pynlong ïa ka DAY-NRLM kawei na ki prokram pynduna ïa ka jingduk kaba heh tam ha ka pyrthei kaba pynshong nongrim ha ka imlang sahlang.
Ka Meghalaya ka long ka nuksa na ka bynta ka jingseng kam seng jam jong ki kynthei bad ka jingpynkupbor ïa ka imlang sahlang
Ka jingjop jong ka DAY-NRLM ka sawa jur ha ka jylla Meghalaya, ha kaba ki longkmie ha ki jaka nongkyndong ki ïalam ïa ka jingkylla kaba jar jar lyngba ka jingsaiñdur thymmai bad ka jingseng kam seng jam. Ki sienjam jong ka Mission ki la ïarap ïa ki hajar ngut ki longkmie ban sdang ïa ki kam barit baria, ban tei ïa ka jingshaniah halade, bad ban noh synñiang shibun sha ka ïoh ka kot jong ki ha ka thaiñ.
Kawei ka khana kaba kongsan ka dei ka jong ka kong Heinidamanki Kanai na West Khasi Hills district, kaba la pynkylla dur ïa ka jingim jong ka lyngba ka Kyrshanlang Self Help Group. Hadien ba ka la ïasoh ha u bnai Kyllalyngkot 2020, ka la sdang ban pynmih ïa ki sabon ba la shna da ka kti ba la khleh bad u syntiew kulab, aloe-vera, sohniamtra bad lemongrass. Lyngba ka jingïalam lynti na ka Meghalaya State Rural Livelihoods Mission (MSRLM) bad ka jingplie lad sha ka kam pisa lyngba ka SHG jong ka, ka la ïoh ïa ka ram na bank kaba T.1.8 lak ha u snem 2023.
Kane ka la ïarap ïa ka ban pynïar ïa ka kam jong ka, ban thied ïa ki kor, bad ban pynthikna ka jingbha jong ki mar lyngba ka jingtest ha ki laboratory. Hapoh shisnem, ka jingkamai jong ka ha ka shisnem ka la palat ïa ka T.1 lak, kaba la ai ïa ka ïa ka jinglaitluid bad jingshong shngaiñ ha ka liang ka pisa tyngka. Mynta ka ai jinghikai ïa kiwei pat ki dkhot jong ka SHG ha ka kam shna sabon, kaba ai mynsiem ïa ki longkmie ha ka shnong jong ka ban long ki nongseng kam seng jam.
Ka khana shaphang jong ka, ka pyni ïa ka jingkylla kaba kham ïar kaba jia ha kylleng ka jylla Meghalaya ha kaba palat 3.5 lak ngut ki longkmie SHG ki trei ha ki kam barit baria, ki kam shna kti, ki kam shna jingbam bad ki kam rep. Lyngba ka jingkyntiew ïa ki sap, ka jinglah ban ïoh pisa bad ka jingkyrshan lang, kine ki longkmie ki pynwandur thymmai ïa ki shnong ki thaw jong ki bad ki kyntiew ïa ka roi ka par ha ki jaka nongkyndong ha ka Jylla.
Ka jingkynthup ïa ki kam pisa tyngka bad ka jingkiew ka ïoh ka kot ba la ïalam da ki longkmie.
Ka jingpynkupbor ïa ki longkmie ka don ha ka bynta pdeng jong ka DAY-NRLM. Ka Mission ka la ïarap palat T. 11 lak klur ha ka jingai ram sha ki SHG lyngba ki jaka ai ram, ba la kyrshan da ki ram khlem da hap buh bynda bad ki lad pynduna bai sut.
Ka rynsan jong ki 47,952 ngut ki Bank Sakhi bad ki Banking Correspondent Sakhi ba la shah hikai ha kylleng ka ri India ka pyndap ïa ka jingduna hapdeng ki SHG bad ki bank, kaba pynsuk ïa ki jingbuh pisa, ki jingplie lad ban ïoh ram bad ki jingsiew jingdiah lyngba ka lad digital. Ka jingsiew bai shim ram kaba heh bha hapoh ka Mission kaba palat ïa ka 98 percent ka pynpaw ïa ka jinglong ryntih bad ka jinglong ba janai jong ki SHG jong ki kynthei, kaba pynshisha ba ka jingpynkupbor ïa ka ïoh ka kot bad ka jingkitkhlieh ka ïaid ryngkat ryngkat.
Ka kamai kajih kaba ïaineh lyngba ki kam rep bad ki kam bym ïadei bad ka rep ka riang.
Ka DAY-NRLM ka kyntiew ïa ka kamai kajih ha ka kam rep bad ki kam bym ïadei bad ka rep ka riang lyngba ki jingïarap ba la buh ryntih. Palat 4.62 klur ki Mahila Kisan (longkmie nongrep) ki la ïoh jingmyntoi na ki rukom treikam ba ïadei bad ka rep ka riang ba la kyrshan da ki Krishi Sakhi bad Pashu Sakhi, kiba ai ïa ki jingshakri ha ka rep ka riang bad ka kam ri jingri ha ki shnong ki thaw.
Ka Start-up Village Entrepreneurship Programme (SVEP) ka la kyrshan ïa 3.74 lak tylli ki kam ha kylleng ki 282 tylli ki block, kaba kyntiew ïa ka jingsaiñdur thymmai ha ki bynta kum ki kam shna kti, ki kam shna tiar ha ki jaka nongkyndong bad ki kam shna jingbam.
Ban pynkhlaiñ shuh shuh ïa kine ki jingpyrshang la seng 6,000 tylli ki kynhun rep ba la pynïasoh lang bad 1.95 lak tylli ki kynhun nongpynmih mar, kiba ai jingmyntoi ïa palat 50 lak ngut ki longkmie ha ki jaka nongkyndong bad pynthikna ïa ka ïoh ka kot kaba ïar, kaba ïaineh ha ki jaka nongkyndong.
Ka Jingkyntiew ïa ki sap: Ka jingpynkhreh ïa ki samla nongkyndong na ka bynta ka lawei.
Ka DAY-NRLM ka buh jingmut bha ha ka jingkyntiew ïa ki sap lyngba ki artylli ki skhim ba kongsan jong ka kiba long, ka Deen Dayal Upadhyaya Upadhyaya Grameen Kaushalya Yojana (DDU-GKY) bad ki Rural Self Employment Training Institute (RSETI).
Ka DDU-GKY, ka prokram ba ïadei bad ka jingai kam na ka bynta ki samla nongkyndong kiba don ha ka rta kaba 15 haduh 35 snem, ka la ai jinghikai ïa 17.5 lak ngut ki samla bad ka la lah ban pynrung kam ïa ki 11.48 lak ngut na ki haduh u bnai Jylliew 2025. Katba ki RSETI, kiba la kyrshan da ki bank, ki phai khmat ha ka jingai jinghikai ban seng la jong bad ha ka kamai kajih na ka bynta ki samla kiba 18 haduh 50 snem ka rta. Haduh u bnai Jylliew 2025, kine ki jaka ai jinghikai ki la ai jinghikai ïa 56.69 lak ngut ki kandidet ha kaba 40.99 lak ki la seng kam la jong lane ne ki trei ha ki kam ïoh jingsiew.
Napdeng ki jylla, ka Uttar Pradesh, Odisha, bad Andhra Pradesh ki la paw kum ki jylla kiba lah ban treikam bha hapoh ka DDU-GKY, katba ka Uttar Pradesh, Rajasthana bad Madhya Pradesh ki lamkhmat ha kaba pyntreikam bha ïa ki RSETI.
Ka jingkyntiew ïa ka jinglah ban ïoh ïa ki ïew lyngba ka SARAS Aajeevika Melas.
Ban pynkhlaiñ ïa ki jingïasoh bad ki ïew na ka bynta ki mar SHG, ka Tnad pynroi jaka nongkyndong ka pynlong ïa ki SARAS Aajeevika Mela ha ka ri bad ki jylla. Ka SARAS Aajeevika Mela 2025, kaba la pynlong ha New Delhi naduh ka 5 tarik haduh ka 22 tarik Nailur 2025, ka la pyni ïa ki mar tynrai bad ki mar thymmai jong ka SHG, kynthup ïa ki sabon kynbat ba la shna da ka kti jong ka Meghalaya, ki jaiñ ba la thaiñ da ka kti, bad ki mar organic.
Kine ki exhibition ym tangba ki plie ki lad ban die hynrei ki kyntiew ruh ïa ka jingtbit jong ki nongïashim bynta ha ka jingpynkhreh, ka jingpyni ïa ki mar bad ka jingpynïaid ïew online. Ka National Institute of Rural Development and Panchayati Raj (NIRD&PR) ka la pynlong 44 tylli ki prokram ban pyntbit ïa ka bor treikam ha kine ki lai snem ba la dep ban pynkhlaiñ ïa ki dkhot jong ka SHG ha ka jingïaid ïew bad ka jinglah ban seng kam seng jam.