Shillong, Risaw 28 : Ki la don bun ngut ki heprit na kylleng ki jaka pule jong ka nongbah Shillong kiba la wan ban shim bynta ha ka lympung ïakob jngi kaba la pynlong da ka True North Fitness Centre & Swimming Academy, ba la tip ïa ka kum ka 1st All Shillong Inter School Swimming Championship 2025 ha ka shlem ai jinghikai kaba don ha Lapalang.
Kane ka jingïakob kaba ar sngi, la shem bad ïohi ïa ka jingwan ban ïashim bynta da kumba 155 ngut ki khynnah na ki 25 tylli ki skul kiba don hangne hapoh ka nongbah, ïa kaba la wan ban ai mynsiem lem da ki kmie ki kpa, kaba pynshongshit ïa kane ka jingïakob.
Ïa kane ka jingïakob, la leit ban plie da u Bah Keith Syiemlieh ba dei uwei na ki dkhot ba la rangbah tam ka True North Centre.
Ka jingïakhun jong ka sngi ba nyngkong, ka long kaba shongshit bha da ka jingïashim bynta jong ki khynnah skul ha ki jingïakhun ba itynnad bad ba ïakhaid bha da ki khynnah skul jong ka St Edmund’s, St Anthony’s, Assam Rifles Public School (Sports), Khasi Jaiñtia Presbyterian Girls HS School, Seven Set School, Pine Mount School, Loreto Convent bad kiwei kiwei.
Ha kane ka jingïakhun la lah ban pynlong haduh 26 tylli ki jingïakob kiba kynthup naduh ka 200m individual medley ba la pynlong na ka bynta ki khynnah shynrang bad kynthei, ïa kaba la phiah pat ïa ki ha ki kyrdan jong ka 18-20, 15-17, 13-14, 11-12 & 9-10, ha kaba ïa ki heats baroh la lah ban pynlong shwa ha ka por mynstep bad la pynbud pat ïa ki jingïakhun phainal ba la pynlong ha ka por nohphai sngi.
Na ka ka liang ki bor pynïaid ka True North, ki la lah ruh ban pyndep ïa ka jingsam ïa ki takma, ha kaba la wan ban don lang ki saw ngut ki riew pawkhmat kiba kynthup ïa u Kishore Subba, u dkhot ba la Rangbah bha ka Meghalaya Swimming Association, Bah Aubrey Laloo, trai jong ka Body Zoo Gym ryngkat ka samla Rifiness Warjri, ka thei samla ba khynnah ka jylla kaba lah ban kiew ïa u lum Everest, nagngta sa ka Bonafilia Shullai, kaba long kawei na ki samla ïalehkai phutbol kaba dang shen ka la lah ban don bynta bad ka kynhun ïalehkai phutbol jong ka kynhun U-17 jong ka ri.
Ha ka jingïakhun ka skul Pine Mount bad ka skul St Edmund’s ki la ïoh ban khur ïa ka nam lahduh ha ka jingiakob ha ka 1st Interschool Swimming Championship 2025.
Ïa kane ka lympung ialehkai la wan ban pynhap pyrda da ka Kong Patricia Mukhim katba u Bah Brian Kharpran Daly u la long u Symbud Kongsan.
Ka St. Edmund’s bad Pinemount ki la don ïa ka kynhun kaba bun ngut tam ban shim bynta ha kaba baroh ki la don haduh 155 ngut ki nongjngi kiba wan ban shim bynta na ki 25 tylli ki skul. Ka St. Edmund’s ka la ïoh ban khur 29 tylli ki takma kynthup 10 tylli ki takma ksiar, 10 tylli ki rupa bad 9 tylli ki rnong. Katba ka Pinemount ka la khur 19 tylli ki takma kynthup ïa ki 6 tylli ki takma ksiar, 6 tylli ki takma rupa bad 7 tylli ki takma rnong.
Nalor kine ki la don ruh bun kiwei pat ki khusnam ba la sam sha ki nongjop ha ki jingïakob bapher bapher kynthup naduh ka khusnam kaba kyrpang na ka bynta ki khynnah shynrang bad kynthei la ka long naduh ka rta kaba 9 -10 snem, 11 – 12 snem, 13 -14 snem, 15 -17 snem bad 18 – 20 snem.
