Mawkyrwat, Risaw 26: Ka Eastern Border Sports Association jong ka Mawsynram Block ha ka sngi thohdieng jong ka taïew ka la ïoh ban pynhap pyrda noh ïa ka lympung ïalehkai kynjatbol ba la tip kum ka 1st Inter School Football Tournament 2025 jong ki khynnah ba 15 snem, 17 snem bad 17 snem jong ki khynnah shynrang bad kynthei ha madan Dewbyrtha Mawsynram, East Khasi Hills District.
Ki nongjop ha ka jingïalehkai jong ki khynnah ba 15 jong ki khynnah kynthei dei ka Kenbah Malai COG, jong ki khynnah kynthei ba 17 snem dei ka Laitbah Union Higher Secondary School, jong ki khynnah shynrang ba 15 dei ka St. Francis Xavier’s Secondary School, jong ki khynnah shynrang ba 17 snem dei ka Mawsynram Higher Secondary School.
Haba ai jingkren ha ka jingïalang ba lyngkot, u President Rangbah ka Eastern Border Sports Association jong ka Mawsynram Block kumjuh kum uBlock thaiñ, kata u bah Alvin K. Sawkmie u la khublei bad ai mynsiem ïa ki nongkitkam bad dkhot ka Association ba kin nang pynlong ïa lum kine ki jait jingïalehkai da kaba ai jinghikai bad ban pynmlien ïa ki khynnah shynrang bad kynthei ïa ki kam ïaehkai khnang ka kin nang ban kiar na ki jingdih ba sniew.
Ha ka juh ka por, u la pynsngew ruh ïa ka jingthmu jong ka Association ba lada ka lad ka plie kin sa pynlong sa ïa ka Athletics Games ha ki snem ban wan. Kumta u la kyntu ïa ki skul ba kin long kaba la khreh ïa kiwei kiwei ruh ki jait jingïalehkai ba kan kham shit kham shngaiñ bad kham itynnad.
Ïa ka jinglang lyngkot la pynïaid da u u bah Hiamdor Rapsang, Working President jong ka Eastern Border Sports Association, ha ryngkat ka jingdonlang u Rev. Mitchell Thongni – Principal District War Sepngi Christian Secondary School, u Jai Skhemlon uba dei u Adviser jong ka Eastern Border Sports Association, ki nonghikai, ki khynnah skul lem bad kiwei de.
Khatduh eh ka Association ka la ai khusnam kyrpang kum ka jingsngewnguh sngewburom bad ka jingñiewkor ïa ka Laitbah Union Higher Secondary School namar ka la pynpeit ïa shibun ki kam ba kiwei kim poi pyrkhat ha kaba katba ka league ka dang ïaid ha ki taïew ba la dep ka la pynlong ïa ka Cleaning drive lyngba ki khynnah skul jong ka ban pynkhuid ïa ka sawdong sawkun jong ka madan ïalehkai kaba la khring ïa ka jingmut jingpyrkhat jong kiba bun bad kaba la long ka nuksa kaba bha.
