Khur jingjop ka Demthring haka Super Division, ka Catholic Youth SC haka 1st Women League jong ka WJDSA

Jowai, Risaw 26: Ka Demthring ka la ïoh ban khur jingjop ha kawei na ki jingïalehkai jong ka lympung phutbol kyrdan ‘Super Division Football Tournament – 2025’ ïa kaba la tip kum ka “17 U Kiang Nangbah Memorial Trophy” bala pynïaid da ka West Jaiñtia District Sports Association, (WJDSA) Jowai kaba la long ha ka sngi Saitjaiñ, 25 tarik ha madan Kiang Nangbah Stadium, Dongmihsngi Jowai. Katba ka kynhun ki thei ïalehkai jong ka Catholic Youth SC ki la jop ïa ka jingïalehkai jong ka 1st Women League Football Tournament 2025.
Haba phai sha ka jingïalehkai kaba nyngkong jong kane ka sngi la sakhi ïa ka Demthring kaba la pynliem noh da 6-1 kol ïaka Mooknor Thadmuthlong.
U namtam ha kane ka sngi na ka bynta ka Demthring udei u Primrose Lamat, da kaba ïoh hat trik lyngba ki lai tylli ki kol kiba u la thep ha ka 14, 34 & 87 minit, ki lai tylli kiwei pat ki kol kidei kiba la thep da u Forman Khongsit (46’), u Mebakynsai Pale (89’) bad u Civility Khongmalai (90+5’). Ka shikol na ka Mooknor Thadmuthlong la thep da u Ioolangki Sana (57’).
Haba phai sha ka jingïalehkai jong ka lympung 1st Women League Football Tournament 2025 kaba la long ha kane kajuh ka sngi la ïohi ïa ka Catholic Youth SC kaba la jop da 2-0 kol ïaka Q.C.S Football Women Club. ïa kitei ki ar kol na ka Catholic Youth SC la thep da ka Aiti Nongtdeh ha ka minit kaba 17 nangta bad ka Ebadashisha Dkhar haka minit ba 55.