Nongstoiñ, Risaw 25: Ka Chief Minister’s District Level Youth Engagement Program 2025, kaba ar sngi kynthih halor ka phang ‘Empower Youth, Empower Meghalaya’ ha ka jingpynïaid jong ka District Sports Officer West Khasi Hills District ka la poi noh sha kaba kut ha ka sngi palei jong ka taiew.
Kane ka prokram ka la long kaba ishongkun bad itynnad bha ha kaba la sakhi ïa ki sap ki phong bad ki jinglah jong ki samla kiba dei napoh ki block ki bapher bapher jong ka West Khasi Hills District, kynthup ïa ka Mawshynrut C&RD Block, Shallang C&RD Block, Ri Muliang C&RD Block, Rambrai C&RD Block bad ka Nongstoiñ C&RD Block.
Ha kane ka sngi pynkut ba la pynglong ha Vani Hall Pyndengrei, u bah Gabriel Wahlang MLA ka Nongstoiñ Constituency, u la long u kongsan ha ka jingïasynran lang u bah H.K. Thabah, Additional Deputy Commissioner, kum u Symbud Kongsan, ka kong B. Syiem, District Sports Officer, Father Marius Thongni, Parish Priest ka Pyndengrei Parish, lem bad ki nonghikai, ki samla pule bad ki nongmihkhmat na ki Club bapher bapher jong ka District West Khasi Hills.
Ki samla pule na ki san tylli ki Block jong ka District ki la ïakhun ha ki jingïalehkai bapher bapher na ka bynta ban ïoh ïa ka kabu ban mihkhmat ïa ka District sha ka jingïakhun ha ka State Level Competition, kynthup ïa ka Folk Dance, Folk Song, Guitar Competition, Tug of War, Painting, One Act Play bad shibun kiwei pat ki jingïakop.
Kane ka program ka dei ka lynti kaba kyrpang ban ai lad ïa ki samla ban pynpaw ïa la ki sap ki phong bad ki jinglah jong ki ha ki bynta kiba pher bapher kaba long ka thong jong u Myntri Rangbah ka Jylla, kata ka long ban kyntiew ïa ki samla ka Jylla Meghalaya.
Ha ka sngi pynkut ïa kane ka prokram, ki kongsan ki la ïoh ban sam ruh ïa ki khusnam sha ki nongjop, da ki khusnam ki bapher bapher kum ka dak ban pyrto ïa ka jingtrei shitom jong ki bad ban ai mynsiem shuh shuh na ka bynta ki samla ba kin nang kiew shaphrang ha ki liang baroh.
Ha ka jingkren jong u kongsan, u bah Gabriel Wahlang u la pynpaw ka jingkmen bad ka jingkitbok kit rwiang ïa ki nongpynïaid, ki nonghikai bad baroh kiba la shim bynta, da kaba ong ba ki samla ki dei ka jingkyrmen jong ka jylla bad ki dei ban ïai trei shitom ban wanrah ïa ka roi ka par bad ka jingkylla ha ka jylla Meghalaya, la ka dei ha ka sap ka phong jong ki ne ka pule puthi. Ki dei ban don ka thong kata ban tei ïa ka imlang ka sahlang, ïa ka District West Khasi Hills hi baroh kawei.
Hapdeng ki jingtynjuh bad ki jingeh kiba ki samla ki mad bad ki ïakynduh, kum ha ki jingdih kiba sniew bad kiwei kiwei pat ki kam, pynban ki samla ki dei ban ïakhun ïa kita bad ban pyndonkam hok ïa ka sap ka phong, ki jingnang jingstad kiba U Blei u la ai ha ki, khnang ba kin long ki khlur ka Ri ha ka lashai jong ka jingim.
