Jngoh u heh ka tnad ïa ki ophis MIB ha Meghalaya kum shi bynta ka Special Campaign 5.0

Shillong, Risaw 25: Kum shi bynta jong ka Special Campaign 5.0 kaba dang ïaid shakhmat jong ka Sorkar India, u Mihir Kumar Jha, Under Secretary, Information and Broadcasting, New Delhi u la leit jngoh ïa ki ophis treikam bapher bapher jong ka Tnad ha Meghalaya, kynthup ïa ka Doordarshan Kendra (DDK), All India Radio (AIR), Press Information Bureau (PIB), Central Bureau of Communication (CBC) bad Regional Academy of Broadcasting & Multimedia ha nongbah Shillong mynta ka sngi. Ka jingleit jngoh ka thmu ban bishar bniah ïa ka jingïaid shaphrang ka kam hapoh ka campaign bad ban pynshlur ïa ki rukom treikam kiba bha tam ha ka rukom pynïaid ïa ki jaka treikam, ka jingkhuid jingsuba bad ka jingsynshar.
Ha ka jingleit jurip, u Jha u la bishar bniah ïa ka jingpyntreikam ïa ki katto katne ki bynta ba kongsan jong ka campaign, kynthup ïa ki jingpynkhuid, ka jingpynduh ïa ki jaboh jabaiñ, ka jingpynkylla digital ïa ki rekod lyngba ka e-Office, ka jingpyndonkam pura ïa ki jaka treikam bad ka jingpynbha ïa ki lad pynbeit ïa ki jingeh. U la ïakren bad ki ophisar bad ki nongtrei jong baroh saw tylli ki unit jong ka MIB, da kaba ai jingïaroh ïa ki jingpyrshang jong ki ha kaba pynïahap ïa ki sienjam ba ïadei bad ka thaiñ bad ki thong kiba kham ïar jong ka jingtreikam kaba paka, kaba shai bad ka jingpynïaid kam kaba ïaineh.
Hapoh ka Special Campaign 5.0, ki ophis jong ka nongbah Shillong ki la shim ïa ki sienjam kum; ka jingpynkhuid bad weng ïa ki tiar kiba la rim bha ban pynlait ïa ka jaka, ka jingkylla sha ki rukom treikam e-Office na ka bynta ban pynbha ïa ka rukom pynïaid ïa ki file, ka jingshai bad ka jingtreikam ka bym pyndonkam ïa ki kot, ka jingpynbeit thymmai bad pynitynnad ïa ki jaka treikam na ka bynta ka jingtreikam kaba kham bha bad ka jingitynnad, bad ki jingpynlong ïa ki jingthung dieng hapoh ka sienjam ‘Ek Ped Maa Ke Naam’.
U Mihir Kumar Jha u la ai jingïaroh ïa ka jingïashim bynta jong ka DDK bad ka AIR ha kaba pynbiang ïa ka jingkhuid jingsuba bad kaba ïadei bad ka mariang ha ki jaka, ka PIB na ka bynta ka jingpynïaid ryntih ïa ki jingthoh bad ki kot ki sla, bad ka CBC na ka bynta ki jingpyrshang jong ka ban ai jingtip ïa ki paidbah ban pynphriang ïa ka jingtip shaphang ka jingkhuid jingsuba, ka jingpynneh pynsah ïa ka mariang, bad ki sienjam jong ka sorkar.
Ka Special Campaign 5.0 ka pynleit jingmut ha ka jingkhuid jingsuba, ka jingbuh jingtip, ka jingpynduna ïa ka jingsahkut bad ka jingpynbha ïa ka jingshakri paidbah ha baroh ki ophis sorkar. Ka Tnad Information and Broadcasting ka la pyntreikam tyngeh ïa ka campaign lyngba ki unit jong ka ha ka thaiñ bad ki field unit, da kaba pynthikna ba ïa ka jingthmu jong ka Special Campaign 5.0 la pyndep ha ka rukom kaba dei.
Ïa kane ka jingleit jngoh la pynkut da ka jingïalang bishar bniah kaba la don lang ki heh ophisar jong ka DDK, AIR, PIB, bad CBC Shillong, ha kaba la ïakren ïa ki rukom treikam kiba bha tam bad ki jingpynkhreh ïa ki kam ban wan ban pynneh ïa ka jinglong kaba bha kaba la ïoh hapoh ka campaign.