Ka Bihar pyrshah ïa ka Dadra bad Nagar Haveli ha ka final

Guwahati, Naitung 02 : Ha ka final jong ka lympung ïalehkai Junior U-17 Women’s National Football Championship 2022-23 yn sa sakhi hapdeng ka Bihar pyrshah ïa ka Dadra and Nagar Haveli hadien baroh kitei ki ar kynhun ki la khur jingjop ha ki jingïakhun pyrshah ïa ka Haryana bad Arunachal Pradesh ha ki jingïakhun semifinal kaba la long ha ka sngi Saitjaiñ ha Indira Gandhi Athletic Stadium.
Ha ka jingïakhun semifinal kaba nyngkong, ka Bihar ka la pynliem ïa ka Haryana da 3-1. Ha katei ka jingïakhun ka Shruti Kumari ka la thep nyngkong na bynta ka Bihar ha ka jingïalehkai ba dang ïaid lai minit lyngba ka bol ba la pashat da ka Sabara Khatun na shaphang kamon kaba la poi beit beit ha ki kjat ka Shruti kaba khlem da pynlehnoh ei ka la thep beit jlang shapoh kol.
Katba ka Haryana ka la ïoh ban pynphai ha ka minit ba 16 lyngba ka Saniya, kaba la thep ïa ka kol kaba itynnad bha da kaba pyndep tang tiak ha kaba ka thei ap kol ka Bihar ka khlem poi pyrkhat shuh ba ka bol kan rung shapoh jar.
Hapdeng ka jingïakhun kaba itynnad bad ïakhaid bha, ka Sabara Khatun ka la thep pyntam biang na bynta ka Bihar ha ka minit ba 21, ka Sabara Khatun nyngkong ka la rah shwa ïa ka bol da kaba pyllait ruh na ka thei ïalehkai dien ka Haryana bad khlem da pynsep ei ka la khyrwit tyngeh beit shapoh kol.
Haba wanphai sha ka jingïalehkai jong ka kylla miet, ka Lucky Kumari ka la pyntam sa shi kol na bynta ka Bihar bad kaba 13 kol na bynta jong ka ha kane ka tournament bad ka la thep ïa katei ka shi kol ha ka minit ba 79.
Ha kawei pat ka jingïakhun semifinal, ka Dadra and Nagar Haveli ka la la pynliem da 5-0 ïa ka Arunachal Pradesh. Ka nam tam jong ka Dadra and Nagar Haveli kadei ka Pooja kaba la thep hat-trick.
Ka Dadra and Nagar Haveli ka la lamkhmat ha ka minit ba 14 ha kaba ka Pooja ka la thep ïa ka shi kol. Ka Pooja ka la thep sa shi kol ha ka minit ba 20 lyngba ka freekick bad ka la pyndep ban thep hat-trick ha ka minit ba 67.
Ha ka minit ba 81, ka Sandhiya ka la khyrwit tyngeh ha kaba ka bol ka la leit dei ïa u dieng kol bad wanphai biang kaba la poi ha ki kjat jong ka Vandana Kumari kaba la thep ïa ka kol kaba saw na bynta ka Dadra and Nagar Haveli.
Ka Pooja ka la thep khatduh ha ka jingïalehkai kaba la jan poi artad sha kaba kut ha kaba ka Dadra and Nagar Haveli ka la ïoh ban ïalehkmen da kaba ïoh rung arsien arwat sha ka final bad ban sa ïalehkai ha ka sngi Nyngkong.