Shillong, Risaw 21 : Ka Primary Heath Centre (PHC) ha ka shnong Dangar, East Khasi Hills District, kala tynrong ïa ka kam ban ai ka jingshakri la kum ka Community Health Centre (CHC) namar ka jingtuid ki nongpang ban wan wad jingsumar,khublei ïa ki doktor, ki nos bad ki nongtrei ka koit ka khiah, ka dei ka sur ba mih na u paidbah ka thaiñ kiba tuid shim dawai na kane ka jaka sumar.
Kum ka PHC ka dang don shibun ki jingduna ban pynïahap kyrdan bad ki CHC, kiba la don kham bun ki Doktor, ki nos, ki tiar sumar kiba bun jait, ki jaka sumar nongpang ba kham bun, bad kiwei kiwei, hynrei hapdeng ki jingbym biang kat sha ba phai, kane ka jaka sumar ka Sorkar ka la lah ban ai ïa ki lad jingsumar kat kiba lah toi sha u paidbah.
Nalor kine ki jingbym biang, ka jingduna kaba ktah eh ïa ka jingai jingshakri jong kane ka jaka sumar mynta ka dei ka jing bym biang ki dawai/ka jingduna ki dawai ban ai sha ki paid nongpang.
ïa kane la lap da ka jingjurip ka seng Hynniewtrep National Youth Federation (HNYF) Southern Border Area ha ka 20 tarik Risaw.
Ka jingtuid u paidbah ban leit wad jingsumar na kane ka PHC, ka seng HNYF-Southern Border Area kala dawa ïa ka Sorkar khamtam ïa u Myntri ka koit ka khiah ba dei ban kyntiew kyrdan noh ïa ka sha ka CHC ba pura.
Ha ka jingjurip la shem ba ki paid nongpang kiba wan wad jingïarap na kane ka PHC kim dei tang kiba na ka Dangar bad ki shnong ba marjan hynrei wat na ki shnong khappud kiba hap hapoh ka South West Khasi Hills District.
U President ka HYNF-Southern Border Area Bah Kyllang S Thongni, ula pyntip ba kane ka PHC kala ai ka jingshakri ïa kumba 45 tylli ki shnong kiba don ha khappud, kaba kdup ïa palat 30 hajar tam ki nongshongshnong.
“Ngi la ïoh ïakynduh ïa u Medical Officer uba la pyntip ba ki don shibun ki jingduna ha kane ka jaka sumar kynthup naduh ki dawai dashin, ka umbam umdih bad kiwei kiwei” ong u Bah Kyllang.
Ula ong, ka jingduna dawai ka dei eh namar ka jingbun jong ki nongwad jingsumar ne wan shim dawai kiba la wan na kylleng ki jaka. “Namar kata, ngi dawa ïa ka Sorkar ba kan kyntiew kyrdan noh ïa kane ka PHC sha ka CHC khnang ba ki paidbah ka thaiñ kin ïoh ïa ka jingsumar kaba biang bad bap aka” ula ong.
Lah ban kdew hangne, ka Dangar PHC kala sdang ai jingshakri naduh u snem 1989 ha ka por jong u (L) Purno A Sangma, kum u Myntri Rangbah ka Jylla.
U Bah Kyllang u pyntip baka HNYF kan sa leit ïakynduh shen ïa u Myntri ka Koit ka Khiah ban ïakren halor ki jingduna ha kane ka jaka sumar bad kumjuh ruh ban dawa kyntiew kyrdan noh ïa ka sha ka CHC.
