Kloi ka PSM ban mih shakhmat lada ym lah pynbeit ka Sorkar ïa ka jingeh ha Lapangap

Jowai, Risaw 21: Ka Pnar Students’ Movement (PSM) kala kren shai ha ka jingleit jurip jong ka mynta ka sngi ba ar ïaka shnong Lapangap da kaba ong “lada ka sorkar jylla kam lah ban pynbeit noh ïa jingeh ki nongrep ban leit ot ïa u kba na ki pynthor kba, kum ka seng kala long kaba kloi ban mih shakhmat na ka bynta ki para jaitbynriew.
Ha u kyrwoh khubor na u President samla Embhah Passah ula ong, kiba bun na ki nongshong shnong ka Lapangap ki dei kiba im da ka kam rep kam riang bad mynta ka sngi ki dkhot ka seng kila sakhi ba ki nongrep ka Lapangap kila ïoh lad ban ot kba tang ha ki bynta ba shaneng hynrei sha ki bynta ba shawah la dap da ki pulit ka Assam. Halor kane ula pynrem jur ïa ka jingtlot jong ki pulit ka jylla.
Katba u samla Owan Paswet Working President PSM Central Body ula ong balei ka sorkar ka pynleit jingmut tang ha ki kam sngewbha kiba don ha khap sor ban pynbiang ïa ki jingdonkam, katba sha ki thaiñ khappud ka eh beiñ khlem don kano kano ka jingbahkhlieh ïaka ïap ka im jong ki.
“Kum ka jait bynriew Pnar ki dang long ki briew kiba ïaishah bad kiba kohnguh khlem da pynkheiñ ïa kino kino ki jingbthah ne ki kyndon aiñ jong ka sorkar”, la ong u samla Owan.
Ka seng kala kren shai lada ki paid nongrep jong kane ka thaiñ Lapangap ki donkam ïa ki ban ïamih paidbah ki kloi ban mih shakhma ban ïakhun na ka bynta ka hok ban ïa kyrshan para jaitbynriew.
U la kyntu ïa u MLA ka thaiñ uba dei u Symbud Myntri Rangbah da kaba ong balei u klet ïa kine ki nongshong shnong ha khappud kiba ïakynduh shibun ki jingeh.