SHILLONG, Risaw 20: Ka Nongkseh SC ka la khur pura ïa ki lai poiñ da kaba pynliem noh da 4-0 kol ïa ka Nongrah SC ha kawei na ki jingïalehkai jong ka Shillong Sports Association First Division Football league 2025 ba la long hynne ka Lah sngi U Blei (20.10.2025) ha madan First Ground-SSA Stadium, Polo.
Kiba la pynkhihjar ha kane ka jingïakhun na ka bynta ka Nongkseh ki long u Banskhemlang Mawlong (16’), u Mebankhraw K Wahlang (18’), u Hardy C Nongbri (52’) bad u Kitboklang pale (64’).
Ka jingïalehkai jong ka SSA First Division Football league 2025 ha kane ka sngi Ba ar (21.10.2025) kan sdang ha ka por 1:15 baje nohphai sngi, ha kaba ka Mawtawar SC kan aireng pyrshah ïa ka Nongkrem SC.
