Ka jingjop jong ka seng saiñ pyrthei Voice of the People (VPP) ha kane ka kynti ha ka jingiakhun ïa ka MP elekshon halor ka nongrim ban ïoh ïa ka jingkyrshan jong ki paidbah da ka jingieit bad da ka mynsiem ba kylluid khlem ka jingshah thied ha ki bor jong ka pisa ka long kawei na ka khubor jong ka jingkyrmen. Kumta ka long kaba dei hok ïa baroh ban buh ïa ka jingkyrmen ba kiei kiei baroh kin poi sha ka thong kumba la thmu bad mang ban ïaid sha kata ka lynti jong ka jingkylla. Hooid ym lah ban len ba ka elekshon MP ka pher shibun ban ïanujor bad ka elekshon MLA bad MDC namar ba ki kandidet ki don ia ka jingïadei kaba jan bad ba shimet bha bad ki paidbah nongkyrshan. Hynrei ha kane ka kynti la ïohi ba ka seng VPP ka la lah ban pynïajan ne connect ïalade sha ki paidbah kat haduh ba ka la lah ban ïoh ïa ka jingjop kaba don burom haduh katta katta ha kane ka elekshon MP bad lah ban phah ïa u Dr. Ricky Syngkon sha ka Dorbar Parliament ha Delhi ban mih khmat na ka Shillong Parliamentary Constituency.
Ka long kaba sngewtynnad shibun ban ïohi ïa ka jingsngew ym tang ïa ka jingieit jaidbynriew jong ki nongialam hynrei ruh ïa ka jingsheptieng Blei jong ki nongialam jong katei ka seng sain pyrthei, wat la ha kiba bun ki khep ngi lah ban ïohi ban sngap ïa ki jingïakawang ktieh kiba jur ha ka por jong ka jingïalap elekshon. Kumta uwei u riew rangbah u la ong ba ka long kaba donkam ba ngin pynshong nongrim ym eh tang ha ka ktien hynrei ha ki kam jong ki ruh bad kumba ki paidbah ki la ai ïa ka mon jong hi, ha kane ka kynti ka long ka lad bad ka kabu ba kin lah ban buddien pat sa ïa ki kam. Kampher wat la u dei u MP ba tang marwei hynrei kum u dkhot jong ka iing dorbar Parliament kyrmen ba u Dr. Ricky un lah ban ïoh shisha ïa ka jingkyrkhu U Blei ban lah ban ïasaid na ka bynta ki mat bad ki jura jong ka jaidbynriew bad ka jylla hi baroh kawei.
Hooid kumba ka long mynta hapoh ka jylla ki MLA jong ka VPP ki dang don tang saw ngut, bad wat la katta ruh lah ban ïohi ia ki dak ki shin bad ka liang pyrshah ka la kham long kaba sawa bad kaba ka liang synshar ki la hap ban phikir bha ha kiba bun ki liang, khmatam hadien jong kane ka jingjop ïa ka shuki MP ha kaba la i kumba ki paidbah ki la kyntait war ïa kiwei pat ki seng saiñ pyrthei bad jied ïa ka VPP da ka jingkyrmem sha ka jingkylla. Kan ym slem shuh hi ba kan sa don noh sa ka Elekshon MDC ruh bad kumba ka paw hi kiba bun ki paidbah ki kwah ban wanrah ïa kane ka seng sain pyrthei sha ka bor haba peit na kaei kaba la jia ha kane ka elekshon MP, hynrei ym lah pat ban shu pynkut beit kumta ka por kan sa batai bad kan sa pyni ruh ïa ka kam ban pynskhem ïa kiei kiei baroh.
Ka Jylla bad khamtam ki paidbah nongshnong shnong jong ka ri Khasi Jaintia ki long kiba donbok shibun ba ki lah ban ïoh ia ka seng saiñ pyrthei kaba long ka liang pyrshah kaba khlaiñ, khnang ba ki seng saiñ pyrthei kiba don ha ka liang synshar ruh kim ym shong kli kti, hynrei kin pyni ïa la ka jong ka jingtbit ha ka synshar khadar khamtam lei ba ki la ïoh ban don ha ka bor la da ki phew snem. Ka jinglah ban ïoh ïa ka Elekshon MDC kan nang ïai maitphang shuh ba yn lah ban ithuh khambha ïa ka jinglong jingman jong ka synshar khaddar ha ka jylla bad ha ka khamtam ha kaba ïadei bad ka hok bad ka jinglong tynrai jong ka jaidbynriew rit paid. Hooid kum ki riewpdeng ngim don ïa ka ban kynthoh bad ka sorkar MDA ka dei ka sorkar kaba sniew, hynrei kumba u paidbau u la dep ban jied ngi kyrmen bad khmih lynti ba ka dei ka sorkar kaba bha hi. Hynrei kan long kaba sngewtynnad ba lada ki paidbah kin dang ïoh shuh shuh ïa ka jingshakri ne ka sorkar kaba khambha shuh ruh.
Baroh kin sa ïoh ban shaki da lade hi ha kane ka elekshon MDC lada ki paidbah kin jied ban pynjop shisha ïa ka seng VPP ne kumno? te ngi lah ban ong ba ha ka MLA ruh ka la don ha ka lynti sha ka thong. Ha kum kine ki por ka long ka lad ïa ki nongialam bad ki dkhot jong kane ka seng saiñ pyrthei ban dang ïai pynjanai bad pynjai shuh shuh ialade ha ki kam bad jingshakri khnang ba ha ka por kaba dei biang ki paidbah kin shem ba kiei kiei kila kham bha katba nangïaid ki sngi. Ka long ruh ka kabu ïa ki riew saiñ pyrthei kiba la shah kynnoh ba ki ñiewsting eh ïa ki paidbah ba ki ruh kin lah ban pynbeit bad pynjanai ïalade ha baroh ki liang kum ki nongsynshar khnang ba kaei kaba ki paidbah kila dep ban ai bad shaniah ha ki, kin ym shah khnieh noh na ki. Na ka bynta jong ngi kum ki riew paidbah hi ym don kano kano ka jingpher lada ngin lah ban ïoh shisha ia ki nongsynshar kiba trei na ka bynta u paidbah ym na ka bynta ka jingmyntoi shimet. Kumta ka jingkyrmen ka long beit ba ngin poi sha ka thong ban long ka jingmyntoi bad ka burom ïa ka jylla hi baroh kawei.
