Nongstoiñ, Naitung, 01: Ka bym trei pyndep jong u kontraktor ïa ka surok na Mawdiang – Mawkyllon, kaba ka jingjngai ka long tang kumba ar kilomitar shiteng, ka la pynlong ïa ki nongïalam jong ka Synjuk Nongsynshar Shnong Nongtrai Sepngi ba kin diaw mynsiem haduh katta katta bad ban kynthoh laiphew jait.
U bah Birbor Riangtem nongïalam ka Synjuk haba ïakren bad u nongthoh khubor mynta ka sngi, u la ong ba naduh ba ka sorkar ka la ai jingtrei ha uwei u kontraktor ba un pynbha bad siang rong ïa katei ka surok, ki paitbah ka thaiñ ki la kmen shi katdei. Hynrei kaba pynlyngngoh ka long ba ka jingai jingtrei jong ka sorkar ïa utei u kontraktor, ka la long pynban kum kaba shu ai da ka jingbym banse, namar imat ym don kontraktor satia hapoh ka jylla.
U la ong ba namar ka jingjur palat u slap ha kine ki taïew ba la dep bad ka jingbym long shuh ban ïaid. Kumta ka synjuk ka la pynbna paitbah ba ha ka sngi saitjaiñ 2 tarik Naitung, kin ïamih paitbah ban maramot ïa katei ka surok tang ba ki Mahindra pickup kin ym sahkut haba leit buh ïa ki mar bam shaduh Langdongdai.
U bah Riangtem u la pynkynmaw ruh ba ha kaba ïadei bad ka jingpynsahteng jong u kontraktor ban pyntrei ïa katei ka surok, kat haduh ba na ka liang ki riew rangbah ka thaiñ ki la leit ban ïakynduh ïa u Executive Engineer jong ka PWD bad ki la ai da ka jingthoh. Nangta ïa u SDO bad ki la leit ban ïakynduh ruh ïa u Deputy Commissioner ban ïakren halor katei ka surok, hynrei ka jingleit ïakynduh jong ki ïa kitei ki heh sorkar, ka khlem seisoh.
La ïathuh ba dang ha ki bnai ba la dep ki la leit ban ïakynduh ruh ïa u Empowers Officer SRRDA, PMGSY ha Shillong bad la ai ruh da ka jingthoh halor ka jingpynsahteng jong u kontraktor ïa katei ka jingtrei, khnang ba un bthah ïa u ba un pyndep noh ha suwa ban kut ka por ba la buh da ka sorkar. Nalor kata ki la kynthoh ruh ba imat ba u bah Prestone Tynsong Symbud Myntri Rangbah, u ba bat ruh ïa ka tnad PWD u don ka jingïadei bad utei u kontraktor, lymda kumta un ym nud ban pynsahteng ïa ka jingtrei haduh mynta.
La ong ba ka sorkar ka la dei ban da bishar bniah ïa ki kontraktor shuwa ba kan ai jingtrei, namar lada kan shu ai thurmur kat ia ki kontraktor kiba shu kwah ban ïoh jingtrei hynrei kim don pisa ban ai ïa ki nongbylla kam don jimgut satia. La ong ba lada u kontraktor um lah ban trei pyndep ïa katei ka surok hapoh u bnai Ïaïong, na ka liang ka synjuk kim banse ban mih madan ban pynlong da ka jingïakhih lane ban leit sha ka Ïingbishar, ban dawa ïa ka hok ba ki dei ban ïoh kat kumba ka sorkar ka la dep mang pisa na ka bynta ban pynbha ïa ka surok.
