Shillong, Risaw 15: Ka Iing Bishar High Court jong ka jylla kala hukum ban thung ïa ka Committee ki lai ngut ki dkhot ki ban bishar bniah ïa ka jinglong jingman ba mynta bad ka rukom treikam jong ki weighbridge bad ki weigh pads kiba don hapoh ka Jylla.
Kane ka rai kala mih haba bishar ïa ka Public Interest Litigation (PIL) bala mudui da u nongtrei mon sngew bha Tenny Dard M Marak, kaba kynnoh ïa ka jingduhnong kaba khraw ha ka khajna namar ka jingbym treikam bha bad jingbym biang ki tiar ha ki weighbridge.
“Ngi tyrwa ban thung ïa ka Committee ki lai ngut ki dkhot ki ban wad ïa ka rukom long jong ki weighbridge bad weigh pad mynta ha ka Jylla bad la ki dei kiba dang treikam pura”ong ka Division Bench ba kynthup ïa u Chief Justice Soumen Sen bad Justice W Diengdoh ha ka hukum ba pynmih ha ka sngi Ba-ar.
“Halor ka jingkyrpad jong ki nongïasaid aiñ ki liang mamla, ïa kane mukotduma la rah ban bishar haduh ka 16 tarik Naiwieng 2025” kala bynrap.
