Nongpoh, Risaw 15: U wei u draibar bala dih buaid u ba la shah bat noh ha ki pulit ka Ri-Bhoi katba ka talasi bad ka jingkhynra ïaki kali pynkheiñ aiñ ka dang ïaid shakhmat.
Kaba sngew thamula ka long ba utei u briew bala dih buaid u la tyrwa ruh da ka pisa T.100 ïa u Senior Superintendent of Police ka Ri-Bhoi tang ban pynlait noh ïa u na katei ka jaka, hynrei ngat pynban haka kuna kaba heh kum u nongpynkheiñ aiñ bad buaid haba ñiah kali.
Kum ban shu kdew hangne, watla ki pulit ki ju pynsngewthuh paidbah bad maham ruh lyngba ki rynsan social media bad lad pathai khubor, ki ba bun naki paidbah kim pat pei shkor satia hadien ba ki pulit kila lap ïa bun ki nongpynkheiñ aiñ ryngkat u bilor kyiad haka por ba bat steering haka jingkhynra hynnin ka miet ha baroh ar tylli ki bynta jong u surok 4-lane.
Lyngba kane ka khubor ki pulit ki maham ruh ïaki paidbah kiba pyndonkam ïaki iit iong beaiñ ba ki dei ban weng noh, ki jingpyndait bad pynitynnad ba bun rukom khamtam ki light LED kiba ktah ïa kiwei pat ki paidbah haba ïaid mar pyrshah, ban pynbiang ïaki kot ki sla, ki seatbelt, helmet bad kumta ter ter ban lait na kano kano ka jingmynsaw bad ka jingshah daiñ kuna.
