SHILLONG, Risaw 15: Ka kynhun ki nongïalehkai Karate jong ka Meghalaya hapoh ka lama jong ka All Meghalaya Karate-Do Association [AMKA], ki la sei madan ïa ka mynsiem ïakhun kaba shlur jong ki da kaba khur haduh 62 tylli ki takma ha ka lympung 4th North East Zone Karate Championship 2025.
Kane ka Championship kaba ar sngi lynter ka sdang naduh ka 11 haduh 12 tarik u Risaw, 2025, bad ka la long ha Itanagar, Arunachal Pradesh.
Na ka bynta kane ka Championship ka AMKA ka la phah ïa ka kynhun kaba khlaiñ bha kaba don 108 ngut ki nongïalehkai, ban ïashim bynta ha ki kyrdan ïakop bapher bapher naduh ka Sub-Junior, Cadet, Junior, U-21 bad kyrdan Senior. La synran lang ïa ka kynhun ïalehkai jong ka jylla ryngkat bad 7 ngut ki Team official bad 8 ngut ki Technical official.
Da kaba khur 62 tylli ki takma, ba kynthup 12 tylli ki takma Ksiar, 11 tylli ki takma Rupa, bad 39 tylli ki takma Rynpa, ki nongïalehkai ka jylla ki la wanrah ïa ka jingsarong bad jingithuh ïa ka Jylla hi baroh kawei.
La ïoh ruh ban jied ïa ki nongjop takma ksiar bad rupa na kane ka Championship ban mihkhmat ïa ka North East Zone ha ka lympung ïalehkai Karate jong ka KIO All India Inter Zone Karate Championship 2025 ka ban wan, kaba la thmu ban long ha Goa ha u bnai Nohprah 2025. Kane kamut ba kin don 23 ngut ki nongïalehkai jong ka AMKA (kiba la jop takma ksiar bad rupa) ki ban sa don bynta ha ka kynhun jong ka North East Zone ha ka Championship ha Goa.
Ha ka jingïalang plie ïa ka lympung, ka la don ka jingpynkup burom ïa ka Kynjailin L. Mawnai, ka nongjop takma rnong ha ka 9th South Asian Karate Championship 2025 kaba la long ha Colombo, Sri Lanka naduh ka 04 haduh ka 06 tarik Naitung, 2025, da ki nongpynïaid kum ka jingithuh ïa ka jingjop jong ka ha katei ka lympung ïalehkai bar ri.
