Shillong, Risaw, 14: Uwei u rangbah uba don jingshitom ha ka bor pyrkhat pyrdaiñ u la shu lait thaw da ka said hadien ba ki Pulit ki la ïoh ban pyllait im na ka kti ki paidbhur kiba la pyrshang ban bom shnong tang namar ka jingsuba menshohnoh.
Une u rangbah u dei uba la tip kyrteng kum u Bah Arnikstar Ryntathiang 35 snem ka rta, uba sah ha ka shnong Wo Mawthlong, ha kaba la lap ba u la ïaid ruma ha ka shnong Kynroh Nongbri ha ka por 9 baje mynmiet Lah Sngi u Blei, 13 tarik, Risaw.
Tang shu ïoh jingtip shaphang ka jingjia, ki Pulit ka Sohiong Out Post, ba la ïalam da u Officer-in-Charge, ryngkat bad u Dy.SP (Operation) Shillong bad u Officer-in-charge ka Mawngap Police Station ki la leit mar mar ban pyllait im ïa u Bah Arnikstar Ryntathiang.
Ki Pulit ki la lap ba ïa u Bah Arnikstar Ryntathiang la ai jingïada da ki nongïalam shnong bad u Sordar ka shnong Umthlong ha Community Hall ka shnong Kynroh Nongbri.
Ki paidbhur kiba la ïalum shabar ka community hall ki la kawang da ki maw bad dawa ruh ban sei shabar ïa u lanot.
Tang shu poi ki Pulit SOT ryngkat bad u DSP (Operation) na Shillong bad u Officer In-charge ka Mawngap bad ki Pulit, ïa u lanot la ïoh ban pyllait im na Community Hall,” la pyntip u SP ka East Khasi Hills Bah Vivek Syiem ha u kyrwoh ba la phah ha ka sngi Baar.
Tang shu ïoh shimti ïa u Bah Ryntathiang, ki Pulit ki la ïalam noh ïa u sha CHC Sohiong ban leh ïa ka medical checkup ha kaba u Medical Officer u la ïathuh ba u Bah Ryntathiang u la mynsaw malu mala bad u la pyntip ruh ba u lanot u dei uba don jingshitom ha ka bor pyrkhat pyrdaiñ bad uba dang don hapdeng ka jingshah sumar ha MIMHANS Shillong.
Ïa ka case la register haMawngap PPolice Station na ka bynta ban pynlong ïa ka jingtohkit bad ban leh tyngeh katkum ki kyndon jong ka aiñ, la bynrap u SP.
