Nongstoiñ, Naitung 1: Watla ka sorkar ka la shimkhia ha kaba ïadei bad ka kam ri dohkha hapoh ka jylla, hynrei na ka liang ki paidbah jong ka West Khasi Hills kim sngew hun satia, namar ka jingshimkhia jong ka sorkar ka dei tang na ka bynta jong kito kiba don pung dohkha, katba na ka bynta kito ki bym don pung pat kim ïoh jingmyntoi satia.
Kumta na ka bynta ban pynsngewbha bad pynsngew tynnad ïa ki paidbah, ka Nonglang Pungsier Angler Association (NPAA) ka synjuk jong ki rawon ha katei ka thaiñ kaba la sumar bad pahara ïa katei ka wah la khatsan snem tam, ka kyrpad ïa ka sorkar lyngba ka tnad ri donkha, ba kan thaw ki lad ki lynti ban pynïoh ïa ki symbai dohkha kiba thymmai ban pynroi ha katei ka wah, namar haduh mynta ha katei ka wah don tang ki khasaw (Maseer).
U bah Pynbiang Shylla uwei na ki nongïalam ba hakhmat ka synjuk, u la ong ba ki nongshong shnong na kylleng ki jaka hapoh ka District ki la ong ba ha kine ki snem la jan, uwei pa uwei u shynrang briew naduh ki khynnah samla haduh ki rangbah jong kawei pa kawei ka shnong ki dei kiba smat bha ban leit khwai dohkha la ka dei ha ki pung ne ha ki wah.
U la ong ruh ba ka don pat ka jingïapher namar ba haba ki leit khwai ha ki pung namar ki hap ban siew da ka pisa sha ki trai pung. Haba kylli pat katno ki ju siew pisa sha ki trai pung, ki ïathuh ba don kiba shim shispah tyngka shi sngi lada ki ïoh dohkha ne kim ioh ruh don pat kiba shim ar spah haduh laispah tyngka shi sngi lada ïoh ne ym ïoh. Nalorkata ki la ïathuh ruh ba ka jingleit khwai jong ki ha ki pung ka pyn buhkhoh bha lada ym dait dohkha namar shisien ba la leit khwai ki trai kim shah lada ym siew pisa.
Ki la ïathuh ba kiba smat ban leit khwai sha ki wah u la ong ba ki briew kiba smat ban leit khwai sha ki wah ki dei kiba ieit bha ïa ka mariang bad ka jingitynnad jong ka bad lada ki ïoh dohkha ne kim ïoh ruh ki pynlut por ha ki wah namar kadei ka jingmlien ka jong ki. Nalorkata u la ong ba na ka bynta ban pynneh bad ïada ïa ki doh um ha ka wah Tyrsung ki dkhot ka NPAA naduh u bnai Nohprah haduh u bnai Jymmang ki ju pahara ïa katei ka wah, khnang ba ki riew shim kabu ban siat bom, khang jar bad wieh da ki dawai bih kin ym ïoh lad ban pynjot.
