Jowai, Risaw 14: Ki bor pynïaid jong ka skul Blooming Buds Pre-School (BBPS), Moosalyngkat-Jowai ha ka sngi baar ki la pynlong ïa ka ‘Educational Field Trip’ da kaba ïalam ïa ki khynnah skul jong ka sha Jowai Fire & Emergency Station, Salini Colony, Mihmyntdu, sha Jowai Police Station, Ïawmusiang bad ha District Early Intervention Centre (RBSK), Panaliar.
Na ka liang ka Aris Nongkynrih, Administrator BBPS ka la ïathuh ba ka thong jong kane ka prokram ka long shi bynta ban pashet ha ki jingmut jingpyrkhat jong ki khynnah skul da kaba kin ïohi markhmat ïa ki jinghikai kiba la ai da ki nonghikai ha ki skul bad kum shi bynta ban ai mynsiem bad saiñdur ïa ki ban long kiba shlur ha ka jingim.
Ha Jowai Fire & Emergency Station, Salini Colony, Mihmyntdu la don lang da u G. S. Singh (Sr. Station Officer), ki arngut ki Leading Firemen ba kynthup ïa u W. Pohthmi bad u L. Darnei kiba la pyni sha kitei ki khynnah skul ïa ki tiar ba pyndonkam ha ka por ba pynlip ïa ka ding ba klang ha kano kano ka jingjia pluh ding.
Ha Jowai Police Station, Iawmusiang la ai jingbatai sha ki khynnah da u I. Ksoo, 2nd O.C Jowai Police Station shapang ki rukom treikam jong ki Pulit, ula ïathuh ruh shaphang u Emergency Number 112 bad u 100 kiba pynsuk ban ïakren bad ki pulit lada don kino kino ki jingshah thombor ïa ki khynnah daki riewsniew.
Katba ha District Early Intervention Centre (RBSK), Panaliar la donlang da ka Dr. Handaka Suting kaba la la batai shaphang ka rukom treikam ka District Early Intervention Centre (RBSK) bad la pyni ruh shapang ki tiar ki tar kiba pyndonkam ban peit bniah ïa ka koit ka khiah jong ki khynnah.
