Khliehriat Risaw 14: U Bah Kyrmen Shylla u MLA jong ka Khliehriat constituency u la pyllait paidbah ïa ka kali kit ñiut ha shnong Ladrymbai Dongwah kaba la wan lyngba ka skhim District Mineral Funding (DMF) bad ha kane ka sngi u Deputy Commissioner ka East Jaiñtia Hills District, u Shivansh Awasthi, IAS u la plie ïa ka ophis Dorbar Shnong ka Ladrymbai Dongwah.
U Bah Kyrmen Shylla u la ong ba ka jingsam ïa ki kali kit ñiut ka long ban kyntiew ïa ka khuid ka suba ha ki shnong ki thaw bad ban pynlong ruh ïa ki sawdong sawkum kiba khuid na ka bynta ban kyntiew ïa ka koit ka khiah.
U MLA u la pynpaw ka jingkmen namar ka jingïadon ryngkat lang kiwei kiwei ki Waheh Shnong bad ong ba kane ka pynpaw ïa ka jingïatylli ka Ladrymbai pyllun kaba pyni ba ki don ka mynsiem ïatreilang na ka bynta ka bha ka miat, u kyntu ïa ki nongïalam shnong ba kin sumar bha ïa kane ka kali kit ñiut kaba long ka jingmyntoi ïa ki bad ong ba ka East Jaiñtia Hills District ka long kaba donbok namar ka jingdon ka District Mineral Funding kaba lah ban wanrah ïa kiba bun ki project kiba long ka jingmyntoi ïa ki paidbah hapoh ka district ha kiba bun ki liang bad u la ai ruh ka jingkhublei kyrpang ïa u Deputy Commissioner uba long u Chairman jong ka DMF uba sngewthuh bha halor ka rukom ban sam ïa ki jingïoh jingmyntoi sha ki shnong ki thaw, uba pynshlur ïa ki paidbah ba kin pynmlien ban pynïakhlad ïa ki ñiut kiba pyut bad ki bym pyut.
Ha kajuh ka por, u Bah Shylla u la pynpaw ka jingkmen ba ka Dorbar Shnong Ladrymbai Dongwah ka la ïoh ïa ka ophis treikam bad kane pat kam dei na ka skim DMF hynrei ka dei ba ka shnong hi ka la shna ïa ka ophis, u la ong ba mynta ki paidbah kiba donkam ban ïakren ïa ki kam ki jam bad ban ïoh ïa ki kot ki sla na ki nongpynïaid shnong kin sa suk bha da kaba ki lah ban ïakynduh ïa ki nongpynïaid shnong hapoh ka ophis treikam. U la ai ruh ïa ka jingiaroh ïa ka jingitynnad ka ïing ophis treikam kaba ki la shna kaba don hajan ka community hall.
U Deputy Commissioner, u Shivansh Awasthi u la kyntu ïa ki bor pynïaid shnong ka Ladrymbai pyllun ba kin shim khia ban wanrah ïa ka khuid ka suba khamtam ha ki jaka ïew, ki jaka ïeng kali, u la pynpaw ïa kane namar ka Ladrymbai ka dei ruh kawei na ki jaka ïew kaba don hapoh ka district namar bunsien ki ñiut ki jakhlia ki kham mih bun ha ki jaka ïew.
U la ban jur ruh ïa ki paidbah ba kin pynmlien ban pynïakhlad ïa ki ñiut kiba pyut bad ki ñiut ki bym pyut ban buh la ka jong, u kyntu ruh ba ki dei ban pyndonkam bha ïa ka kali kit ñiut kaba ki la ïoh bad u kyntu ruh ïa ki paidbah ba kin kyntiew ïa ka khuid ka suba ha ki sawdong sawkun kaba long kum ka jingïada ïa ka mariang.
U la ai ruh ka jingkitbok kitrwiang ïa ka Dorbar Shnong Ladrymbai Dongwah kaba la lah ban shna ïa ka ïing ophis ban treikam.
Kum ban shu bynrap, ha East Jaiñtia Hills District ki la don haduh hynriew tylli ki kali kit ñiut kiba la sam sha ki shnong ki thaw kiba wan lyngba ka skhim jong ka District Mineral Funding bad ka jingthmu jong kane ka skhim ka long ban kyntiew ïa ka khuid ka suba ha ki shnong ki thaw bad kan pynsuk ban bret ïa ki ñiut ha ki jaka bret ba la pynkhreh da ki shnong, shuh shuh na ka liang ki karkhana dewbilat ruh kiba don hapoh East Jaiñtia Hills District ki long kiba kloi ban shim ïa ki ñiut na ki shnong ki thaw ban thang ha ka ding ha ki karkhana jong ki khnang ba ki ñiut kin nym saphret pathar ha ka mariang.
Katba u Waheh Shnong Ladrymbai Dongwah, u Bah Deibor Suchiang, u ai khublei ïa u Bah Kyrmen Shylla uba dei u MLA ka thaiñ bad kumjuh ruh ïa u Deputy Commissioner kiba la pynïoh ïa kane ka kali kit ñiut ha shnong bad kiba ju ïarap ruh ha kaba kyntiew ïa ka bha ka miat jong ka shnong ka thaw.
Kiba la ïadon ryngkat ha kane ka prokram ki kynthup u Waheh Shnong Ladrymbai-B, u Bah Jesper Lyngdoh, Waheh Shnong Ladrymbai Khlieh Dupon, u Bah Chanbok Haiong, Secretary Shnong Ladrymbai Datsimpieñ, u Bah Carmelo. L. Lakiang, u dkhot shnong na Ladrymbai Datsimpein, u Bah Stevenson Suchiang bad kiwei kiwei ki riew rangbah bad ki nongshong shnong ka Ladrymbai Dongwah.
