Mawkyrwat, Risaw 14: Ka ophis jong ka District Mental & Health Programme (DM&HP), South West Khasi Hills District ha ryngkat ka jingïatreilang bad ka District Legal Service Authority, South West Khasi Hills District, ka CHC Ranikor, bad ka Sub Centre Nonghyllam, South West Khasi Hills District ka la ïoh ban rakhe ïa ka World Mental Health Day 2025 kaba halor ka phang, “Access the Services – Mental Health in Catastrophes and Emergencies” ba la pynlong hapoh ka Community Hall, Nonghyllam, South West Khasi Hills District.Ha kane ka sngi ka kong Queency Kharmawlong, Deputy Chief Legal Aid Defense Counsel jong ka District Legal Services Authority (DLSA), South West Khasi Hills District ka la long kum ka kongsan, ka kong M. Marweiñ, Center Administrator-cum-Protection Officer, South West Khasi Hills District kum ka symbud kongsan. Haba ai jingkren na ka kong Queency Kharmawlong, kaba dei ka kongsan ha kane ka program ka la pynshai halor ki aiñ kiba ïa dei kumno ban ïada ïa ki briew ha kaba ïadei bad ka koit ka khiah ha ka jingmut jingpyrkhat bad ymtang kata, kumno ban ïarap ïa ki briew kiba shah ktah ha ka jingmut jingpyrkhat ha kaba ïa dei bad ka aiñ. Ka la kren ruh ïa ki bynta ban kyntiew ruh ïa ka hok jong kiba shah ktah ha ka jingpang jingmut jingpyrkhat.Katba ha ka jingkren jong ka kong M. Marweiñ kaba dei ka symbud kongsan ka la kren halor ka jingshah thombor jong ki briew ha ïing ha sem bad kumno ban ïarap ïa kiba shah thombor bad ka la batai ruh halor ki lad jingïarap kiba lah ban ïoh na ka ophis treikam jong ka One Stop Centre, Social Welfare Department.
Kiwei de kiba la ïadonlang bad kiba la ai jingkren ki long ka Dr. I. Kharmawlong, Ayush Medical Officer, CHO, Nonghyllam Sub Centre kaba la ai ïa ka jingkren lamphrang, ka kong Felaliza Wanniang, Block Functional Specialist napoh ka ophis jong u Block Development Office, Ranikor C&RD Block kaba la pynshai pynshai halor ki Scheme kiba lah ban ïarap ïa kito kiba don ïa ka jingpang jingmut jingpyrkhat, ka kong Alcy Lyngkhoi, Clinical Psychologist, District Mental & Health Programme, South West Khasi Hills District kaba la kren ïa ka phang, “Mental Health & Mental Illness” ne “pynshai halor ka koit ka khiah jong ka jingmut jingpyrkhat bad ki jingpang kiba ïadei bad ka jingmut jingpyrkhat”.Kiwei de ki nongïashim bynta ki kynthup ïa ki Nonghikai, ki khynnah skul, ki Rangbah shnong bad Secretary shnong, ki Seng Longkmie, Seng Samla jong ka Shnong Nonghyllam, Nongjri bad Nongumsur, ki ASHA bad ki Anganwadi.Nalorkata, la sam ruh ïa ki khusnam sha ki nongjop ïa ka jingïakop dro dur kum shibynta ban rakhe ïa ka World Mental Health Day 2025 ba la shimbynta da ki khynnah skul jong ka Jingaiti Secondary School Nonghyllam bad Nongjri Presbyterian Secondary School. Uba wan nyngkong u long u Kynsaibor Dkhar na Jingaiti Secondary School Nonghyllam, ba ar u long u Emonstar na Jingaiti Secondary School Nonghyllam, bad ba lai da ka Dapynhun Dkhar na Nongjri Presbyterian Secondary school.La sam ruh ïa ki IEC sha ki Rangbah shnong jong ka Nonghyllam, Nongjri bad Nongumsur.
La pynlut ïa ka ne ka program da ka jingkren ai khublei na ka kong N. Marbaniang, Monitoring & Evaluation Officer, District Mental & Health Programme (DM&HP), South West Khasi Hills District.
