Shillong, Naitung 01 : Ka Mawlai SC ka la lah ban khanglad ïa ki jingpyrshang thep kol ka Shillong Lajong FC ha ka jingïalehkai ïa ki minit ba dang sah da kaba pynliem da 1-0 ha ka jingïakhun ha ka sngi Thohdieng ha madan Third Ground jong ka lympung ïalehkai OC Blue Shillong Premier League, ïa kaba kine ki ar tylli ki team ki la ïalehkai ha ka 21 tarik Jylliew bad pyndep pat ha kane ka sngi Thohdieng.
Ha katei ka jingïalehkai la hap ban pynpep noh shwa hadien ba la ïaid 62 minit na ka daw ka jinglang um ka madan na ka jingther u ‘lapbah. Ka Mawlai ka la mih madan da kaba lamkhmat lypa da 1 kol ïa kaba la thep da u Donborlang Nongkynrih ha ka jingïalehkai kaba la ïaid 30 minit.
Haba phai sha ka jingïalehkai ïa ki minit ba dang sah, ka Shillong Lajong ka la pynkhreh bha da ka thong ban pynphai ïa katei ka shi kol hynrei ka khlem lah ban thep kol.
Ka jingbym lah ban pynphai kol kadei ruh ba ka Mawlai SC ka la pynskhem bha ïa ka kut ban kyrda na ka jingshah pynphai kol. Bad da ka jingïoh ban lamkhmat nyngkong ban thep kol, ka la ai mynsiem ban pyndep ïa ki minit ba dang sah sa kumba shiteng kynta eiei.
Ka Mawlai ka la ïoh tang kawei ka kabu ha ka minit ba 66 hadien ba u Donlad Diengdoh u la ïoh ban pyndei da ka khlieh ïa ka bol ba la shut lyngba ka free-kick hynrei ka la tam noh ïa u dieng kol. Watla katta ruh, ka kynhun ka la ïakhun tyngeh khlem da shah pynphai kol bad ki la lah ban pynneh ïa kane ka rukom ïalehkai haduh kaba kut.
Lyngba kane ka jingjop, ka Mawlai haduh mynta ka la jop ha baroh laisien mih madan bad ka kamai 9 point. Ka bat ruh ha ka kyrdan ba nyngkong na ka miej kheiñ point bad kadei ruh tang ma ka ka team kaba khlem pat shah thep kol kylliang. Ka Lajong, ka don ha ka kyrdan ba hynñiew kaba dei ka kyrdan shah pynhiar kyrdan da kaba khur tang 1 point na ki laisien ïalehkai.
Mynta ka sngi Saitjaiñ ka jingïalehkai kan long hapdeng ka Malki SC pyrshah ïa ka Rangdajied United FC ha ka jingïalehkai kaba khatduh jong ka wat kaba lai kaban sdang ha ka por 4 baje janmiet.
