Da 2-1 pynliem ka Lion Sports & Youth Affairs ïa ka Pynthorlangteiñ ha ka 2nd Division ka WJDSA

Jowai, Naitung 01: Ka jingïalehkai phutbol ‘5th Debo Shullai Memorial Trophy’ 2nd Division Football League Cum Knockout Tournament-2022 bala pynïaid da ka West Jaiñtia District Sports Association (WJDSA) kaba la long mynta ka sngi 1 tarik ha madan Kiang Nangbah Stadium Jowai.
Haba phai sha ka jingïakhun mynta ka sngi hapdeng ka Lion Sports & Youth Affairs pyrshah ïa ka Pynthorlangteiñ, na ka liang ka kynhun ïalehkai jong ka Lion Sports & Youth Affairs kala jop da 2-1 kol.
Ïa kitei ki ar kol na ka Lion Sports & Youth Affairs la thep da u Tremiki Lamare ha ka minit kaba 53 bad u Shanborlang Kharsahnoh ha ka minit kaba 78. Katba ïa ka shikol na ka Pynthorlangteiñ la thep da u Wanbiang Bang ha ka minit kaba 65. Ka jingïakhun hapdeng kine ki ar kynhun kala long kaba ïakhaid bha bad kaba itynnad naduh kaba sdang haduh kaba kut kaba la pynhun ïa ki nongwan kyrshan na baroh ki ar kynhun.
Lashai ka sngi 2 tarik ka jingïakhun kan long hapdeng ka Dongmihsngi pyrshah ïa ka N.S.A ha ka por 3 baje nongphai sngi.