Dang ap ka SIT ïa ka kaiphod post mortem halor ka rukom shah pynïap u khynnah 7 snem, ong u SP EKHD

Shillong, Risaw 13: U Superintendent of Police ka East Khasi Hills u Bah Vivek Syiem ha ka sngi Nyngkong u pyntip ba ka SIT ka dang ap ïa ka kaiphod post mortem ban lap ïa ka rukom long ki dak mong ha ka met jong u khynnah 7 snem u Kyrshanbor Kharmudai, kaba lah ban dei da ka ante-mortem lane post-mortem.
Haba ïakren bad ki lad pathai khubor ha ka sngi Nyngkong u SP u la ong, “Ka jingtohkit ka la ïaid shaid shaid, bad ngi dang ap ïa ka kaiphod post mortem ban shai ba kumno une u khynnah u ïap.”
Lah ban pynkynmaw ba ïa ka metïap u Kyrshanbor, uba la jah rngai na la ïing na Nongrah ha ka 8 tarik Risaw, bad la lap ha ka sngi kaba bud kata ha ka 9 tarik Risaw na khlaw Mawpat.
Haba kylli, u SP ula ong, “Ki don ki dak mong, katto katne ki lah ban dei shuwa ka post mortem, katto katne ki lah ban dei ki dak mong ba leh post mortem. Kham bunsien lada ïa ka met la buh slem kan don beit ka dak mong post mortem lane ki dak mong hadien ba ïap na ki daw bapher bapher”.
Halor kane, u Bah Vivek ula ong ba ka SIT kam pat pynthikna satia ïa kano kano ka daw bad ka jingsuba ka bun bha ha kane ka kynti kaba mynta.
Shuh shuh haba ïadei bad kane la ong ba ïa ka jingthmu ba sha lyndet kane ka jingpynïap ka dei ka bym pat shai satia bad ki pulit ki dang ïawad ïa ki daw bapher bapher, kynthup ka jingdawa pisa, ka jingleh khlemakor lane kiwei kiwei ki daw.
Haba ïadei bad ka jingsuba kam “menshohnoh” ha lyndet kane ka jingpynïap, u SP ula ong ba ha kiba bun ki jingjia, kum kine ki jingjia ki mih na ka jingbuh shun, ka jingbishni lane ka jingpynhiar kput, ban ïa ka jingngeit biej.
U la ong, “Ngam pat ju lap ïa ka jingjia khamtam ha ka jingshakri jong ka ba ki briew kila shah pjiar lut ka snam namar ka kam menshohnoh. Ngi la tohkit ïa bun ki jingjia ba kynnoh menshohnoh hynrei ka jingshem pat ka long da kumwei.”