Nongstoiñ, Risaw 13: Ka jingdon jong ka surok PMGSY na Langja haduh Athiabari ka la long ka jingkyrkhu kaba khraw ïa paitbah nongshong shnong jong katei ka thaiñ bad jong ka district hi baroh kawei. Hynrei, kumba ka long ha kine ki sngi ka la I donkam haduh katta katta ban pynheh noh, khnang ba kan pynsuk ïa ki paitbah ha ka leit ka wan bad ha ka kit ka bah.
U bah B.Nonglang secretary bad u bah K.Mawlieh president ka Synjuk Nongsynshar Shnong Jyrngam Sirdarship (SNSJS), haba pyntip ha u nongthoh khubor ki la ong ba ïa katei ka surok kaba jngai kumba 16 kilomitar, la dep siang rong haduh Athiabari.
Hynrei, katkum ka jingïaid ka por ki kali ki la nang bun, katba ka surok pat ka long kaba rit palat, kumta ka buh jingeh bha ïa ki paitbah nongleit nongwan, khamtam ïa ki kali kiba kit jingkit kiba ïaid man la ka sngi.
Nalor kata ki la ong ruh ba katei ka thaiñ ka dei kaba pynmih bun eh u sying, synsar bad kiwei kiwei ki mar rep, ba ki kali ki ju leit buh ha Nongstoiñ bad haduh Shillong, kumta ka la donkam haduh katta katta ban pynheh shuh shuh.
Kitei ki nongïalam ka synjuk ki la ong ruh ba u kwai, ka kait bad u sying, ki dei kiwei pat ki mar rep ba ki paitbah jong katei ka thaiñ, ki hap ban kit sha Hahim bad Boko da kaba ïaid lyngba katei ka surok.
Hynrei, namar ka dei kaba rit bad kyllaiñ bha, ka shem jingeh bha ha ka por lyiur. Kumta ka la donkam bha ba ka surok kan kham kylluid, khnang ban lait na kino kino ki jingïatyngkhuh kali kaba lah ban wanrah ïa ka jingmynsaw.
Ha kajuh ka por ki la ong ba lada katei ka surok naduh Langja haduh Athiabari ka dei kaba la biang, kan long ka jingkyrkhu kaba khraw ïa ki paitbah, kata naduh ka kam khaïi pateng, haba jia ka pang ka shitom, ka jingroi ki shnong ki thaw bad kumta ter ter.
