Shillong, Risaw, 12: Ki samla na ka jylla Manipur kiba wan pule ha nongbah Shillong, Meghalaya ha ka sngi Saitjaiñ ki la pynlong da ka jingïashong kyllaiñ myngngor hakhmat ka Manipur Bhavan, kaba don ha Boyce Road, Laiumkhrah, Shillong ban pynpaw ïa ka jingpyrshah halor ka jingpynpra noh ïa ka iing kaba la rim kaba la tei naduh ha ki snem 1930 eiei.
Ka jingpyrshah jong ka Shillong Manipuri Student’s Union (SMSU) ka long halor ka nongrim ba ka Manipur Bhavan kaba la tip ruh kum ka Red Land Building, ka don ïa ka khanapateng kaba ïadei bad ka kolshor, ka tynrai bad ka lariti jong ki jaidbynriew Manipuri kiba shong basah ha ka jylla Manipur.
Ka Red Land Building, ba la shna ha kaba sdang jong u snem 1940, ka dei ka ingsah jong u Maharaja Bodhachandra bad hangne la ïasoi ïa ka Manipur Merger Agreement ha ka 21 tarik, Nailur 1949.
Ka jingpynpra ïa ka iing kaba rim ka long ban tei noh da ka iing dewbilat kaba thymmai jong ka Manipur Bhavan.
Hynrei ka jingpynpra ïa ka iing kaba rim ka la pynmih pynban ïa ka jingpyrshah kaba jur na ki paidbah ha ka jylla Manipur, kynthup ïa ki kynhun bapher bapher bad ki nongmihkhmat paidbah kiba la dawa ba dei ban pynneh pynsah ïa ka jingtei nam kaba rim.
“Ka bor aiu kaba shim ïa ka jingkitkhlieh ban pynpra ïa ka Manipur Bhavan kaba long ka jingtei nam kaba la rim bad kaba don ïa ka tynrai jingïadei bad ka pakit ki mynnor ka jylla Manipur,” la ong ka samla Sheetal Kshetrimayum ka samla pule na ka Jylla Manipur ha ka jingïakren bad u nonglum khubor.
“Ngi kwah ban ïoh jubab noh kham kloi halor kane,” ka la ong.
Haba kylli ka la ong, “haba ngi la wad jingtip halor ka daw ba la pynpra, la pyntip ïa ngi ba ka dei tang ka jingmaramot hynrei kam shym la long satia kumta hynrei ngi ïoh jingtip pynban hadien ba ladep ban pynpra la shitaiew mynshwa.”
“Ha ka por ba ngi dang kylli ki ong beit ban shu maramot hynrei ynda ngi la wan peit ngi lap ba ladep ban pynpra. Ngi kwah ban tip mano ba donkti ha lyndet bad balei la pynpra ïa ka. Ngin pynlong ïa ka jingïakhih katba ngim pat ïoh ïa ka jubab na ka Sorkar. Katba ngim pat ïoh ïa ka jubab ngin ym sangeh satia ïa ka jingïakhih,” la ong ka Kshetrimayum.
Dang khyndiat sngi, u Myntri Rangbah ka Jylla Meghalaya u Conrad K Sangma ha ka jingleit iuhkjat sha ka jylla Manipur ha ka 10 tarik mynta u bnai u la kyntait war ba ka Sorkar Meghalaya kam don bynta eiei halor ka jingpynpra ïa kane ka iing sahnam.
“Katkum ka jingtip ba la ïoh ha ka jingïakren lyngba ka telephone, la pyntikna ba ka Sorkar Meghalaya kam don bynta eiei bad ka Sorkar Meghalaya kam shym la ai jingbit. Ka dei beit ka kam jong ka Sorkar Manipur,” la ong u Sangma ha ka jingïakren bad ki lad pathai khubor.
U Sangma u la bynrap ruh ba un sa tohkit hi dalade ba ha kano ka rukom la ai jingmut ban pynpra.
“Ngan sa pyrshang ban pan ïa ki hukum sorkar bad ki jingthoh ba la pynmih. Ngi kwah ban kren da kaba shai ba kine ki jingtei nam ba kongsan dei ban pynneh pynsah. Na kata ka daw nga kwah ban ong hangne ba ka Sorkar Meghalaya kam don bynta eiei ruh em. Khlempep ngan sa pynlong ka jingtohkit namarba ka jia ha ka jylla jong nga,” u la ong.
