Shillong, Risaw 12: Ka Shillong International Leo Expo kaba dang ïaid mynta, kaba la sdang naduh ka 3 tarik bad kan kut ha ka 22 tarik mynta u bnai, ka la kylla long ka bneng na ka bynta ki riew ieid bam naba ha kane ka Expo kin lah ban ïoh ïa ki jingbam ba la shet da kane ka jylla, nangta kiba ju bam ha ka ri bad kumjuh ruh ki jingbam ba lah ban ïoh ha ki ri ka pyrthei. Kane ka food court kaba la buh hapoh ka expo ka la kylla long ka pdeng jong ki jingmad kiba bang bad kaba tyrwa ruh ïa ka jingïoh mad jong baroh kiba wan jngohkai.
Napdeng ki jaka bam ki long ka Big Bite Restaurant, kaba la khring ïa kiba bun ki paidbah lyngba ki jingbam bapher bapher kynthup na South India, ka Hyderabadi Biryani, bad ka Kolkata Roll. Bun na ki paidbah kiba sngewbha ban bam ki la leit sha kine ki jaka ba die bam.
Kawei pat ka jaka bam kaba khring ka dei ka AL LAZEEZ, kiba la wanrah ïa ki rukom shet bam naduh Delhi kum ka bam Chicken Seekh Kabab, Butter Chicken Tikka, Malai Chicken Tikka, Shawarma Roll Kabab, bad Afghani Tikka. Kiba wan jngoh ki lah ruh ban mad ïa ki jingbam ba la shet na Kashmir kum ka Kashmiri Wazwan, Kashmiri Kehwa, bad Chicken Tikka.
La ong ba ka Golden Bites stall ka la ïoh ban khring kham bun lyngba ka Turkish Baklava bad kiwei kiwei ki rukom shet. Shuh shuh ka Turkishow ka tyrwa ïa ka Turkish Ice Cream bad kiwei kiba la pynlong ïa ka bynta jong ka bam ha kane ka expo ban paw lyngba ki jingïoh mad bapher bapher.
Ha kane ka snem ka Shillong International Leo Expo ka la ka la ai lad ïa kiba bun kiba wan jngohkai ym tang ba kin shu leit thied na ka bynta ki tiar kiba bha hynrei ki la ïoh ban shim bynta ban mad ïa ki jait jingbam bapher na kylleng ka pyrthei.
Kumta na ka liang kiba pynïaid haba kyrpad ïa ki paidbah kiba wan sha kane ka ïew, ki la ong ba kim dei ban klet ban ïoh ka jingkmen bad la ki jong kiba ieid ba thoiñ ha ka grand food court jong ka Shillong International Leo Expo.
