Shillong, Risaw 12: Arngut ki Professor napoh ka Assam Don Bosco University ki la poi ha ka kyrdan kaba 2% ka bynta kaba halor duh napdeng ki Scientist ha ka pyrthei ba la pynmih bad shon da ka Standford university. U Prof. KG Bhattacharyya, u Professor ha ka tnat Chemistry bad NAAC Coordinator ha Don Bosco university u la don ha ka thup hapoh ka Field of Environmental Sciences katba u Professor Raja Chakraborty uba dei ruh u Principal ka Institute of Pharmacy ha Don Bosco University u la poi ha ka thup ha ka Field of Medicinal and Biomolecular Chemistry.U Prof. KG Bhattacharyya u la don ha ka thup ba hakhlieh duh jong ka pyrthei napdeng ki 2% naduh ka snem 2020.
U Fr. (Dr) Jose Palely, Vice Chancellor ka Assam Don Bosco University u la ong, “Ngi dap da ka jingsngew sarong ïa kane ka jingjop jong ki 2 ngut ki Professor, kaba dei ruh kawei na ki jingpynleit jingmut jong ka University haba ïadei bad ki kam wadbniah ha ki rukom pule bapher bapher, ym tang ïa ki nongtrei bad ki research scholar, hynrei hapdeng ki samla pule Graduate, ngi don ruh ki samla pule Graduate kiba la pynmih ïa ki kot ha ki kyrdan bapher bapher ha la ki jong ki subjek jong ki.” Ka Assam Don Bosco University kadei ka Skulbah kaba nyngkong kaba pynïaid shimet ha ka jylla Assam bad kaba nyngkong kaba la ïoh ïa ka kyrdan UGC 12B, bad kaba nyngkong ban ïoh ïa ka NAAC ‘A’ Grade napdeng ki skulbah shimet ha Assam. Ka university ka la khot rung pule ruh ïa ki samla ha ka MCA bad MBA hapoh ka Centre for Distance and Online Education ba la pynskhem bad mynjur da ka UGC-DEB.
