Shillong, Risaw 12 : Ka Synjuk jong ki khynnah skul barim jong ka Don Bosco Technical School, Shillong hapoh ka lama jong ka Association of the Past Pupils of Don Bosco Technical School, Shillong ha ka sngi Saitjain ki la pynlong ïa ka jingkynduh lang kaba ki ju pynlong man la u snem ha Don Bosco Technical School, Shillong.
Khyndiat shaphang ka kynhun, la seng ïa kane ka kynhun ha u snem 1932 hapoh ka jingbtin lynti ki Phadar, ki Brodar Salesian of Don Bosco (SDB) bad man la u snem khlem jingsangeh la ju pynlong ïa kane ka jingïakynduh ha katei ka skul.
La sdang ïa ka prokram da ka Mass Bakhuid ba la pynmynta da u Fr. John Zosiama, Provincial, Salesian, Shillong Province. Haba sam ïa ka Ktien u Blei, u Fr. John u la ïathuh ba ka jingsdang jong ka jingseng ïa ka kynhun ki khynnah skul barim u Don Bosco ka la jia hadien ba ki khynnah Oratory kiba la mih na ka jingshah hikai u Don Bosco ha Turin ki la wan phai ban ai khublei ïa u Kpa ki samla, u Don Bosco namar ka jingduriap jong u ban pynlong briew ïa ki bad ba ki la lah ban ieng hala ki jong ki kjat wat hapdeng jong ka jinghiran ka pyrthei ha ka por jong ka Industrial Revolution ha Europe.
Hadien ka Mass Bakhuid la bud pat sa ki prokram ba harukom nalor ka kaiphod kut snem na u General Secretary bad u Finance Secretary bad la bsap ruh ïa kiwei ki prokram pynbyrngia na ki khynnah pule ba rim bad kiba mynta kiba la pynshongkun ïa ki nongwan shim bynta.
Na ka liang u Fr. Stephan Shaji, Director, Don Bosco Technical School Shillong, ha ka jingkren u la ai khublei bad ïaroh ia ka jingtrei ki khynnah skul barim ha kaba ïadei bad ki projek bapher bapher bad ki sienjam kiba ki la leh kiba la ïarap shibun ïa ka imlang sahlang bad ai jingkyrmen ruh ïa ki khynnah barim khamtam ha ki por jong ka jingshitom bad shem lanot.
Ha ka jingkren u la ïathuh ruh ba bun kiba pule ha Don Bosco Technical School ki la ïoh jingmyntoi, ki kam ki jam bad ki jaka trei ha ki jaka bapher bapher bad ki la long ruh ki nongseng kam seng jam ha ka imlang sahlang.
La kham pynshong shit ïa ka prokram da ka jingrwai na ki dkhot ba la kham rangbah kynthup ïa Bah George’ Warjri, bad Bah Bindo Lanong.
Kane ka long katkum ka kyrwoh ba la phah da u Organising Secretary ka Synjuk.
